ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
ಪ್ರಸ್ತಾವನ್:-
ಸಾದಾರಣ್ ಜಾವ್ನ್ ಥೊಡ್ಯಾ ಕುಟ್ಮಾನಿಂ ಮರಣ್ ಪಾವಲ್ಲ್ಯಾ ಮ್ಹನ್ಶಾಚಿ ಕೂಡ್ ಘರಾಂತ್ ದವರ್ನ್ ತಾಚ್ಯಾ ವಾರೆಸ್ದಾರಾಂ ಮಧೆಂ ತೊ ವ್ಯಕ್ತಿ ಸೊಡ್ನ್ ಘೆಲ್ಲ್ಯಾ ಅಸ್ತಿ ಖಾತಿರ್ ಝಗ್ಡೆಂ ಜಾಂವ್ಚೆಂ ಪಳೆತಾಂವ್. ಹಾಂಗಾಸರ್ ಅರಂಭ್ ಜಾಲ್ಲೆಂ ಝಗ್ಡೆಂ ತಾಂಚ್ಯಾ ಭುರ್ಗ್ಯಾಂಚ್ಯಾ ಭುರ್ಗ್ಯಾಂ ಮ್ಹಣಾಸರ್ ಮುಂದರುನ್ ವೆತಾ. ತರ್ ಹೆಂ ಝಗ್ಡೆಂ ಅನಿ ಮನಸ್ತಾಪ್ ಉಣೆಂ ಕರ್ನ್ ಅಪ್ಲಿ ಅಸ್ತ್ ಶಾಬಿತ್ ರೀತಿನ್ ವಿಲೆವಾರಿ ಕರುಂಕ್ ಸಾದ್ಯ್ ನಾಂಗೀ? ಸಾದ್ಯ್ ಅಸಾ, ಜರ್ ಎಕ್ ವ್ಯಕ್ತಿ ಅಪ್ಲ್ಯಾ ಮರ್ಣಾ ಉಪ್ರಾಂತ್ ಅಪ್ಲಿ ಅಸ್ತ್ ಕೊಣಾಕ್ ವಚುಂಕ್ ಜಾಯ್ ಮ್ಹಣ್ ಅಶೆತಾಗೀ ತ್ಯಾ ವ್ಯಕ್ತಿಕ್ ತಾಣೆಂ ತಾಚ್ಯಾ ಮರ್ಣಾ ಉಪ್ರಾಂತ್ ವೆಚ್ಯಾ ಬರಿಂ ಜಿವಂತ್ ಅಸ್ತಾನಾಂಚ್ ದಸ್ತಾವೆಜ್ ಬರವ್ನ್ ತ್ಯಾ ವ್ಯಕ್ತಿಕ್ ಪಾವಯೆತ್. ಹ್ಯಾ ದಸ್ತಾವೆಜಾಕ್ ‘ವಿಲ್ಲ್’ ಮ್ಹಣ್ತಾತ್. ಹ್ಯಾ ದ್ವಾರಿಂ ಕುಟ್ಮಾಂತ್ ಯೆಂವ್ಚೊ ಭಿನ್ನಾಬಿಪ್ರಾಯ್ ಉಣೆಂ ಕರ್ಯೆತಾ.
ಭಾರತೀಯ್ ಉತ್ತರಾಧಿಕಾರಿತ್ವ್ ಕಾಯ್ದೊ 1925 ಪ್ರಕಾರ್ ‘ವಿಲ್ಲ್’ ಮ್ಹಳ್ಳ್ಯಾರ್, ಕಾನುನಾಚ್ಯಾ ಪರ್ಗಣ್ನೆ ದ್ವಾರಿಂ ಎಕಾ ವ್ಯಕ್ತಿನ್ ಅಪ್ಲ್ಯಾ ಮರ್ಣಾಂ ಉಪ್ರಾಂತ್ ಅಪ್ಲಿ ಅಸ್ತ್ ಕೊಣಾಕ್ ಮೆಳಾಜೆ ಮ್ಹಣ್ ಬರ್ಪಿನಿಶಿಂ ಅಪ್ಲೊ ಇರಾದೊ ಬರವ್ನ್ ದವರಲ್ಲೆಂ ದಸ್ತಾವೆಜ್. ಹೊ ಇರಾದೊ ತ್ಯಾ ವ್ಯಕ್ತಿಚ್ಯಾ ಮರ್ಣಾಂ ಉಪ್ರಾಂತ್ ಜ್ಯಾರಿ ಜಾತಾ.
‘ವಿಲ್ಲ್’ಚಿ ಪ್ರಮುಕ್ ಲಕ್ಷಣಾ-
- ಕಾನುನಿಂ ದ್ರಶ್ಟೆನ್ ಪರ್ಗಣ್ನಿಂ ಕರ್ಚಿ, ಮ್ಹಳ್ಯಾರ್ ಕಾನುನಿಂ ನದ್ರೆಂತ್ ಜ್ಯಾರಿಯೆಕ್ ಹಾಡ್ಚೆಂ ತಸಲೆಂ ದಸ್ತಾವೇಜ್ ಜಾಂವ್ಕ್ ಜಾಯ್ ಅನಿಂ ಸಾಕ್ಷಿದಾರಾನಿಂ ತಾಂಚಿ ರುಜು ಘಾಲುಂಕ್ ಜಾಯ್.
- ಖಂಯ್ಚಾಯ್ ಎಕಾ ಅಸ್ತಿಚ್ಯಾ ವಿಲೆವಾರಿಕ್ ಸಂಭಂದ್ ಜಾಲ್ಲೆಂ ಜಾಂವ್ಕ್ ಜಾಯ್. ಜರ್ ಎಕ್ ವ್ಯಕ್ತಿ ತಾಚಿ ಅಸ್ತ್ ಪಳೆಂವ್ಕ್ ಮೆನೆಜರಾಕ್ ನಮಿಯಾರ್ತಾ ತರ್ ತಸಲೆಂ ಅಧಿಕಾರ್ ಪತ್ರ್ ವಿಲ್ಲ್ ಜಾಯ್ನಾಂ
- ದಸ್ತಾವೆಜ್ ಕೆಲ್ಲ್ಯಾ ವ್ಯಕ್ತಿಚ್ಯಾ ಮರ್ಣಾಂ ಉಪ್ರಾಂತ್ ಜ್ಯಾರಿಯೆಕ್ ಯೆತಾ.
- ಎಕ್ ಪಾವ್ಟಿಂ ಬರಯಿಲ್ಲೆಂ ವಿಲ್ಲ್ ತ್ಯಾ ವ್ಯಕ್ತಿಚ್ಯಾ ಜಿವಿತಾ ಅವ್ದೆರ್ ಕಿತ್ಲೆಯ್ ಪಾವ್ಟಿಂ ತಾಣೆಂ/ತಿಣೆಂ ರದ್ದ್ ಕರ್ಯೆತಾ (cancel)/ ನವೆಂ ಕರ್ಯೆತಾ/ತಾಕಾ ಚಡ್ತಿಕ್ ಕುಡ್ಸಿಯೆತಾ (Codicil)
- ‘ವಿಲ್ಲ್’ ಕ್ ಸ್ಟ್ಯಾಂಪ್ ಡ್ಯುಟೆಚಿ ಗರ್ಜ್ ನಾಂ ವಾ ವಿಲ್ಲ್ ರಿಜೀಸ್ರ್ತಿ ಕರಿಜೆ ಮ್ಹಣ್ ಕಾಯ್ದೊ ನಾಂ ಪುಣ್ ವಿಲ್ಲಾಕ್ ದೊಗಾಂ ಸಾಕ್ಷಿಂಚಿ ಗರ್ಜ್ ಅಸಾ.
- ವಿಲ್ಲಾಕ್ ಸಾಕ್ಷ್ ಘಾಲ್ತೆಲ್ಯಾಂಕ್ ತ್ಯಾ ವಿಲ್ಲಾ ದ್ವಾರಿ ಅಸ್ತ್ ಮೆಳ್ತಾ ತರ್ ತಾಂಕಾ ತಿ ಅಸ್ತ್ ಅಪ್ಣಾಂವ್ಕ್ ಜಾಯ್ನಾ. ಮ್ಹಳ್ಯಾರ್ ಕೊಣಾಕ್ ಅಸ್ತ್ ತ್ಯಾ ವಿಲ್ಲಾ ಥಾವ್ನ್ ಮೆಳ್ತಾ ತ್ಯಾ ವ್ಯಕ್ತಿನ್ ತ್ಯಾ ವಿಲ್ಲಾಕ್ ಸಾಕ್ಷ್ ಘಾಲುಂಕ್ ಜಾಯ್ನಾ.
ಸಾದಾರಣ್ ಜಾವ್ನ್ ಎಕ್ ದಸ್ತಾವೆಜ್ ವಿಲ್ಲ್ ವ್ಹಯ್ ವಾ ನ್ಹಯ್ ಮ್ಹಣ್ ತಪಸಣ್ ಕರುಂಕ್ ದೋನ್ ವಿಧಾನಾಂ ಅಸಾತ್
- ದಸ್ತಾವೇಜ್ ಬರಯಿಲ್ಲ್ಯಾಚೊ ಇರಾದೊ- ಅಪ್ಲಿ ಅಸ್ತ್ ವಿಲೆವಾರಿ ಕರ್ಚೆ ವಿಶಿಂ ಜರ್ ತ್ಯಾ ದಸ್ತಾವೇಜಾಂತ್ ವ್ಯಕ್ತ್ ಜಾತಾ, ತವಳ್ ತೆಂ ವಿಲ್ಲ್ ಜಾಂವ್ಕ್ ಪಾವ್ತಾ. ನಾಂ ತರ್ ತೆಂ ವಿಲ್ಲ್ ಜಾಯ್ನಾಂ.
- ವಿಲ್ಲ್ ಜ್ಯಾರಿ ಜಾಂವ್ಚೆಂ ತೆಂ ದಸ್ತಾವೇಜ್ ಬರಯಿಲ್ಲ್ಯಾ ವ್ಯಕ್ತಿಚ್ಯಾ ಮರ್ಣಾಂ ಉಪ್ರಾಂತ್- ಜರ್ ತೆಂ ದಸ್ತಾವೇಜ್ ಮರ್ಣಾ ವಿಶಿಂ ಉಲ್ಲೇಖ್ ಕರ್ನಾ ವಾ ಮರ್ಣಾ ಪಯ್ಲೆಂ ಜಾಂವ್ಕ್ ಅಸ್ಚ್ಯಾ ವಿಶಿಂ ಉಲ್ಲೇಖ್ ಕರ್ತಾ ತರ್ ತೆಂ ವಿಲ್ಲ್ ಜಾಯ್ನಾಂ.
ವಿಲ್ಲ್ ಕೊಣೆಂ ಕರ್ಯೆತಾ:
ಭಾರತೀಯ್ ಉತ್ತರಾಧಿಕಾರಿತ್ವ್ ಕಾಯ್ದೊ 1925 ಕಲಂ 59 ಪ್ರಕಾರ್ ಎಕ್ ವಿಲ್ಲ್, ತಕ್ಲೆಂತ್ ಸಾರ್ಕೊ ಅಸ್ಚ್ಯಾ ಅನಿಂ 18 ವರ್ಸಾಂ ಭರಲ್ಲ್ಯಾ ಕೊಣೆಂಯಿ ಬರವ್ಯೆತ್. ದೊಳೆ ದಿಸನಾತಲ್ಯಾ, ಕಾನ್ ಅಯ್ಕಾನಾತಲ್ಲ್ಯಾ, ಉಲೊಂಕ್ ಯೆನಾತಲ್ಲ್ಯಾ ವ್ಯಕ್ತಿನಿಯಿ ವಿಲ್ಲ್ ಬರವ್ಯೆತ್. ಸಾದಾರನ್ ಜಾವ್ನ್ ಭಲಾಯ್ಕೆಂತ್ ಅಸೊನ್, ಅಪ್ರೂಪ್ ಮಧೆಂ- ಮಧೆಂ ತಕ್ಲೆಂತ್ ಅಸ್ವಸ್ತ್ ಜಾವ್ನ್, ಉರಲ್ಲ್ಯಾ ವೆಳಿಂ ಸಾರ್ಕೆಂ ಅಸ್ಚ್ಯಾ ವ್ಯಕ್ತಿನ್ ವಿಲ್ಲ್ ಬರವ್ಯೆತ್. ಎಕಾ ವ್ಯಕ್ತಿನ್ ಎಕ್ ವಿಲ್ಲ್ ಕರ್ತಾನಾ ಮತಿಂತ್ ಸಾರ್ಕೆಂ ಅಸೊನ್, ಜಾಣಾಂ ಅಸೊನ್ ಕರುಂಕ್ ಜಾಯ್.
ಸಂಪೂರ್ಣ್ ಅಸ್ವಸ್ತ್ ಅಸೊನ್ ವ ಅಮಾಲ್ ಸೇವನ್ ಕರ್ನ್ ಮತಿರ್ ನಾತಲ್ಲ್ಯಾ ವ್ಯಕ್ತಿನ್ ವಿಲ್ಲ್ ಬರಂವ್ಕ್ ಜಾಯ್ನಾ. ಎಕ್ ವಿಲ್ಲ್ ಕೋಡ್ತಿಂತ್ ಚ್ಯಾಲೆಂಜ್ ಕರ್ತಾನಾ ವಿಲ್ಲ್ ಕೆಲ್ಲೊ ವ್ಯಕ್ತಿ ಅಮಾಲ್ ಸೇವನ್ ಕೆಲ್ಲೆಂ ವ ತಕ್ಲೆಂತ್ ಅಸ್ವಸ್ತ್ ಅಸಲ್ಲೊ ಮ್ಹಳ್ಳ್ಯಾ ಕಾರಣಾಕ್ ತೆಂ ಸಾರ್ಕೆಂ ನ್ಹಯ್ ಮ್ಹಣೊಂಕ್ ಜಾಯ್ನಾ ತಾಕಾ ಜಾಯ್ ಪುರ್ತಿ ಸಾಕ್ಷ್ ಅಸೊಂಕ್ ಜಾಯ್.
ಎಕ್ ವ್ಯಕ್ತಿ ಪ್ರಾಯೆವಂತ್ ದೆಕುನ್ ತೊ/ತಿ ವ್ಯಕ್ತಿ ವಿಲ್ಲ್ ಕರುಂಕ್ ಸಕನಾ ಮ್ಹಣೊನ್ ವಾದ್ ಕರುಮ್ಕ್ ಜಾಯ್ನಾಂ ಬದ್ಲಾಕ್ ತ್ಯಾ ವ್ಯಕ್ತಿಕ್ ಅಪ್ಲಿ ಜಾಣ್ವಾಯ್ ಉಪಯೋಗ್ ಕರ್ನ್ ಬರಂವ್ಕ್ ತಾಂಕ್ ನಾತಲ್ಲಿ ಮ್ಹಳ್ಳೆಂ ರುಜು ಕರುಂಕ್ ಜಾಯ್.
ವಿಲ್ಲ್ ಕಶೆಂ ರದ್ದ್ ಕರ್ಯೆತಾ?
- ವಿಲ್ಲ್ ಕೆಲ್ಲ್ಯಾ ವ್ಯಕ್ತಿಚೆಂ ಲಗ್ನ್ ಜಾಲ್ಲ್ಯಾ ವೆಳಿಂ; ವಾ
- ಅನ್ಯೇಕ್ ವಿಲ್ಲ್ ವಾ ತ್ಯಾಚ್ ವಿಲ್ಲಾಕ್ ಥೊಡೆಂ ನವೆಂ ಕುಡ್ಸಿಲ್ಯಾ ವೆಳಿಂ (Codicil); ವಾ
- ಕೆಲ್ಲೆಂ ವಿಲ್ಲ್ ರದ್ದ್ ಕರ್ತಾಂ ಮ್ಹಣ್ ಅಪ್ಲೊ ಇರಾದೊ ಬರವ್ನ್ ವಾ ಹೆರ್ ವಿಧಾನಾಂ ದ್ವಾರಿಂ ವ್ಯಕ್ತ್ ಕೆಲ್ಯಾರ್; ವಾ
- ಉಜ್ಯಾಂತ್ ಘಾಲ್ ಲಾಸಲ್ಲ್ಯಾ ವೆಳಿಂ, ವಾ ಪಿಂದುನ್ ಘಾಲ್ಲ್ಯಾ ವೆಳಿಂ, ವಾ ಹೆರ್ ಖಂಯ್ಚ್ಯಾಯ್ ರೀತಿನ್ ತೆಂ ನಾಸ್ ಕೆಲ್ಲ್ಯಾ ವೆಳಿಂ.
ಹ್ಯಾ ವಿಧಾನಾಂ ದ್ವಾರಿಂ ಎಕ್ ವಿಲ್ಲ್ ರದ್ದ್/ನಾಸ್ ಕರ್ಯೆತಾ. ಪುಣ್ ವಿಲ್ಲ್ ರದ್ದ್ ಕರ್ಚ್ಯಾಕ್ ಥೊಡಿಂ ಅಪ್‌ವಾದಾಂ ಅಸಾತ್ ಮ್ಹಳ್ಯಾರ್ ಥೊಡ್ಯಾ ಸಂಧರ್ಬಾನಿಂ ವಯ್ರ್ ಕಾಣ್ಸಿಲ್ಯಾ ಕಾರಣಾಂಕ್ ಎಕ್ ವಿಲ್ಲ್ ರದ್ದ್ ಕರುಂಕ್ ಜಾಯ್ನಾ, ದಾಖ್ಲ್ಯಾಕ್-
- ವಯ್ರ್ ಸಾಂಗಲ್ಲಿಂ ನಿಯಮಾಂ ಹಿಂದ್ವಾಂಕ್, ಬುದ್ದಿಸ್ತ್ ಸಿಖ್ಖ್ ವಾ ಜ್ಯೇನಾಕ್ ಲಾಗು ಜಾಯ್ನಾಂತ್;
- ಮುಸ್ಲಿಮ್ ಕಾಯ್ದ್ಯಾ ಪ್ರಕಾರ್ ಎಕ್ ವಿಲ್ಲ್ ಲಗ್ನಾ ಮುಕಾಂತ್ರ್ ರದ್ದ್ ಜಾಯ್ನಾ;
- ಎಕ್ ವಿಲ್ಲ್ ಅನ್ಯೇಕಾ ವ್ಯಕ್ತಿಕ್ ನಮಿಯಾರ್ಚೆ ಮುಕಾಂತ್ರ್ ಕೆಲಾಂ ತರ್ ತೆಂ ವಿಲ್ಲ್ ತೊ ವ್ಯಕ್ತಿ ಲಗ್ನ್ ಜಾಲ್ಲ್ಯಾ ವೆಳಿಂ ರದ್ದ್ ಜಾಯ್ನಾ.
- ದೋಗ್ ವ್ಯಕ್ತಿ ಸಾಂಗಾತಾ ಮೆಳೊನ್ ಎಕ್ ವಿಲ್ಲ್ ಕರ್ತಾತ್ ತರ್ ತೆಂ ವಿಲ್ಲ್ ಎಕಾ ವ್ಯಕ್ತಿಚ್ಯಾ ಲಗ್ನಾ ದ್ವಾರಿಂ ರದ್ದ್ ಜಾಯ್ನಾ.
- ವಿಲ್ಲ್ ಕೆಲ್ಲ್ಯಾ ಉಪ್ರಾಂತ್ ಜಾಲ್ಲೆಂ ಲಗ್ನ್ ಕಾನುನಾ ಪ್ರಾಕಾರ್ ಸಾರ್ಕೆಂ ನ್ಹಯ್ ತರ್ ಪಯ್ಲೆಂ ಕೆಲ್ಲೆಂ ವಿಲ್ಲ್ ರದ್ದ್ ಜಾಯ್ನಾ.
ಭಾಷೆಚೊ ಪ್ರಯೋಗ್:
ಎಕ್ ವಿಲ್ಲ್ ಬರಯ್ತೆಲ್ಯಾನ್ ತಾಂತ್ರಿಕ್ ಭಾಸ್ ಉಪಯೋಗ್ ಕರಿಜೆ ಮ್ಹಣ್ ನಾಂ. ಸೊಂಪ್ಯಾ ಉತ್ರಾನಿಂ ಹೆರಾಂಕ್ ಸಮ್ಜೊಂಚೆ ರೀತಿನ್ ಬರಂವ್ಕ್ ಜಾಯ್. ಬರಯಿಲ್ಲೆ ಸಭ್ದ್ ಸ್ಪಷ್ಟ್ ಅನಿಂ ಸರಳ್ ಅಸೊನ್, ಗೊಂದೊಳ್ ಸ್ರಷ್ಟಿ ಕರ್ಚೆ ತಸಲೆ ಜಾಂವ್ಕ್ ನಜೊ. ವಿಲ್ಲ್ ಟ್ಯೇಪ್ ಕರಿಜೆ ವಾ ಹಾತ್ ಬರ್ಪಾನ್ ಅಸಾಜೆ ಮ್ಹಳ್ಳೆಂ ನಿಯಮ್ ನಾಂ. ವಿಲ್ಲ್ ಕರ್ತೆಲ್ಯಾಚಾ ಹಾತ್ ಬರ್ಪಾನ್ ಅಸ್ಲ್ಯಾರ್ ತ್ಯಾ ವಿಲ್ಲಾ ವಿಶಿಂ ಕಿತೆಂಯ್ ತಕ್ರಾರ್ ಅಯ್ಲ್ಯಾರ್ ಕೋಡ್ತಿಂತ್ ರುಜು ಕರುಂಕ್ ಸುಲಭ್. ವಿಲ್ಲ್ ಬರಯ್ಣಾರಾಕ್ ಕಳಿತ್ ಅಸಲ್ಲ್ಯಾ ಖಂಯ್ಚ್ಯಾಯ್ ಭಾಷೆನ್ ಬರವ್ಯೆತ್. ಸ್ಟ್ಯಾಂಪ್ ಪೇಪರಾಚೆರ್ ಬರಯ್ಜೆ ಮ್ಹಣ್ ನಾಂ ಬದ್ಲಾಕ್ ಸಾದ್ಯಾ ದೊವ್ಯಾ ಕಾಗ್ದಾರ್ ಬರವ್ಯೆತ್.
ರಿಜಿಸ್ಟೇಶನ್:
ವಿಲ್ಲ್ ಕಡ್ಡಾಯೆನ್ ರಿಜಿಸ್ಟರ್ ಕರಿಜೆ ಮ್ಹಣ್ ನಾಂ. ರಿಜಿಸ್ಟರ್ ಕೆಲ್ಯಾರ್, ಹಾತಾಂತ್ ಅಸ್ಚಿ ಪ್ರತಿ ಸಾಂಡುನ್ ಗೆಲಿ ತರ್ ರಿಜಿಸ್ಟರ್ ದಪ್ತಾರಾ ಥಾವ್ನ್ ಅನ್ಯೇಕ್ ಪ್ರತಿ ಕಾಡ್ಯೆತಾ. ವಿಲ್ಲ್ ರಿಜಿಸ್ಟರ್ ಕೆಲ್ಲೆ ದ್ವಾರಿ ತೆಂ ಎಕ್ ದಾಖ್ಲೊ ಜಾಂವ್ಕ್ ಪಾವ್ತಾ. ವಿಲ್ಲ್ ಕೊಡ್ತಿಂತ್ ರುಜು ಕರಿಜೆ ತರ್ ಉಣ್ಯಾರ್ ಉಣೆಂ ಎಕಾ ಸಾಕ್ಷಿನ್ ಯೇವ್ನ್ ತ್ಯಾ ವಿಲ್ಲಾ ವಿಶಿಂ ಸಾಕ್ಷ್ ದಿಂವ್ಕ್ ಜಾಯ್.
ವಿಲ್ಲಾಕ್ ಕುಡ್ಸುಂಚೆ/ವಿಲ್ಲಾ ಥಾವ್ನ್ ಕಳ್ವುಂಚೆ ವಿಧಾನ್/ಕೊಡಿಸಿಲ್ (Codicil):
ಕೊಡಿಸಿಲ್ ಮ್ಹಳ್ಯಾರ್ ವಿಲ್ಲಾಕ್ ಸಹಕಾರಿ ಜಾವ್ನ್ ಕೆಲ್ಲೆಂ ತಸಲೆಂ. ಎಕ್ ಪಾವ್ಟಿಂ ವಿಲ್ಲ್ ಕೆಲ್ಯಾ ಉಪ್ರಾಂತ್ ವಿಲ್ಲ್ ಕೆಲ್ಯಾ ವ್ಯಕ್ತಿಕ್ ತ್ಯಾ ವಿಲ್ಲಾಕ್ ಕಿತೆಂಯ್ ಕುಡ್ಸುಂಕ್/ಕಳ್ವುಂಕ್/ವಿವರಣ್ ದೀಂವ್ಕ್ ಅಸಾ ತರ್ ಕೊಡಿಸಿಲ್ಲಾ ಮುಖಾಂತ್ರ್ ಕರ್ಯೆತಾ. ಹೆಂ ಕೊಡಿಸಿಲ್ಲ್ ವಿಲ್ಲಾಕ್ ಸಾಂಗಾತ್ಪಣ್ ದಿತಾ ಅನಿಂ ವಿಲ್ಲಾಚೊ ವಾಂಟೊ ಜಾಂವ್ಕ್ ಪಾವ್ತಾ. ಹೆಂ ಕೊಡಿಸಿಲ್ಲ್ ಕೆಲ್ಲ್ಯಾ ಉಪ್ರಾಂತ್ ತೆಂ ವಿಲ್ಲ್ ಕೆಲ್ಲೊ ದೀಸ್ ಕೊಡಿಸಿಲ್ಲ್ ಕೆಲ್ಲ್ಯಾ ದೀಸಾ ಥಾವ್ನ್ ಜ್ಯಾರಿಯೆಕ್ ಯೆತಾ.
ವಿಲ್ಲ್ ಕೆದಾಳಾ ಮ್‌ಲ್ಯಾಧಾರಿತ್ ಜಾಯ್ನಾ?
ಭಾರತೀಯಾ ಉತ್ತರಾಧಿಕಾರತ್ವ್ ಕಾಯ್ದ್ಯಾಚ್ಯಾ ಕಲಂ 59, 61, ಅನಿಂ 89 ಸಕ್ಯೆಲ್ ದಿಲ್ಲ್ಯಾ ಸಂಧರ್ಬಾನಿಂ ಎಕ್ ವಿಲ್ಲ್ ತಾಚೆಂ ಮೊಲ್ ಹೊಗ್ಡಾಯ್ತಾ.
- ಕಲಂ 59 ಚ್ಯಾ ಪ್ರಕಾರ್ ಎಕ್ ವಿಲ್ಲ್ ತಕ್ಲೆಂತ್ ಅಸ್ಕತ್ ಅಸ್ಲ್ಯಾನ್, ಪ್ರಾಯೆಕ್ ಪಾವಾನಾತಲ್ಯಾನ್ ವಾ ಅಪುಣ್ ಕಿತೆಂ ಕರ್ತಾಂ ಮ್ಹಣ್ ಜಾಣಾ ಜಾಂವ್ಕ್ ಸಾದ್ಯ್ ನಾತಲ್ಯಾ ವ್ಯಕ್ತಿನ್ ಕೆಲ್ಯಾ ಸಂಧರ್ಭಾನಿಂ ತ್ಯಾ ವಿಲ್ಲಾಕ್ ಮೊಲ್ ಅಸನಾಂ;
- ಕಲಂ 61 ಚ್ಯಾ ಪ್ರಕಾರ್ ಎಕ್ ವಿಲ್ಲ್ ಅನ್ಯೆಕ್ಲ್ಯಾಚಾ ದಬಾವಾಕ್ ಒಳಗ್ ಅಸೊನ್ ಕೆಲ್ಲ್ಯಾ ವೆಳಿಂ ವಾ ಮೊಸ್ ಕರ್ನ್ ತೆಂ ವಿಲ್ಲ್ ಕರಯ್ಲ್ಯಾ ವೆಳಿಂ ವಾ ಹೆರ್ ಖಂಯ್ಚ್ಯಾಯ್ ಸ್ವಂತ್ ಮನಾನ್ ಕರುಂಕ್ ಅಸಾದ್ಯ್ ಅಸಲ್ಲ್ಯಾ ಸಂಧರ್ಭಾನಿಂ ಕೆಲ್ಲ್ಯಾ ವೆಳಿಂ ತಾಕಾ ಮೊಲ್ ನಾಂ;
- ಕಲಂ 89 ಚ್ಯಾ ಪ್ರಕಾರ್ ಎಕಾ ವಿಲ್ಲಾಂತ್ ತ್ಯಾ ವ್ಯಕ್ತಿಚೊ ಅಪ್ಲಿ ಅಸ್ತ್ ವಿಲೆವಾರಿ ಕರ್ಚೊ ಸ್ಪಷ್ಟ್ ಉದ್ದೇಶ್ ದಿಸೊನ್ ಯೆನಾತಲ್ಯಾ ವೆಳಿಂ.
ಮತಿಂತ್ ದವ್ರುಂಕ್ ಜಾಯ್ ಅಸಲ್ಲೆಂ ಪ್ರಮುಕ್ ಸಂಗ್ತಿಂ:
- ಹರೇಕ್ಲ್ಯಾ ವ್ಯಕ್ತಿನ್ ಅಪ್ಲಿ ಅಸ್ತ್ ವಿಲ್ಲ್ ಕರ್ನ್ ವಿಲೆವಾರಿ ಕೆಲ್ಯಾರ್ ಸಬಾರ್ ಸಮಸ್ಯೆ ಉಣೆಂ ಕರ್ಯೆತ್;
- ವಿಲ್ಲ್ ಕರ್ಚ್ಯಾ ವ್ಯಕ್ತಿನ್ ವಿಲ್ಲ್ ಕರ್ಚ್ಯಾ ದಿಸಾ ಅಪುಣ್ ಸಾರ್ಕ್ಯಾ ಭಲಾಯ್ಕೆಂತ್ ಅಸಾ ಮ್ಹಳ್ಳಿ ದಾಕ್ತೆರಾಚಿ ಸರ್ಟಿಫಿಕೇಟ್ ಅಪ್ಣಾವ್ನ್ ವಿಲ್ಲಾ ಸಾಂಗಾತಾ ದವರ್ಲ್ಯಾರ್ ಭೊವ್ ಬೊರೆಂ;
- ವಿಲ್ಲ್ ಬರಯ್ತಾನಾ ಅಪ್ಲ್ಯಾ ಹಾತ್ ಅಕ್ಷರಾನಿಂ ಬರಯ್ಲ್ಯಾರ್ ಬೊರೆಂ;
- ವಿಲ್ಲ್ ರಿಜಿಸ್ಟರ್ ಕೆಲ್ಯಾರ್ ತೆಂ ಭದ್ರ್ ಅಸೊಂಕ್ ಸಾದ್ಯ್ ಅಸಾ;
- ವಿಲ್ಲಾಕ್ ಸಾಕ್ಷ್ ಘಾಲ್ಚೆ ವ್ಯಕ್ತಿ ಜಾತಾ ತಿತ್ಲೆ ತರ್ನಾಟೆ ಅಸೊನ್ ಕುಟ್ಮಾಚ್ಯಾ ಸಂಭಂಧಾ ಭಾಯ್ರ್ ಅಸ್ಲ್ಯಾರ್ ಬೊರೆಂ;
- ವಿಲ್ಲ್ ಬರಯ್ತಾನಾ ಉಪಯೋಗ್ ಕರ್ಚೆ ಸಬ್ದ್ ಸ್ಪಷ್ಟ್ ಅಸೊಂಕ್ ಜಾಯ್;
- ವಿಲ್ಲ್ ಕೆದಾಳಾಯ್ ಬರಯಿಲ್ಯಾ ವ್ಯಕ್ತಿಚ್ಯಾ ಮರ್ಣಾ ಉಪ್ರಾಂತ್ ಜ್ಯಾರಿಯೆಕ್ ಯೆತಾ.
- ರಿಜಿಸ್ಟರ್ ಕೆಲ್ಲೆಂ ವಿಲ್ಲ್ ರಿಜಿಸ್ಟರ್ ದಪ್ತಾರಾ ಥಾವ್ನ್ ಪ್ರತಿ ಕಾಡಿಜಾಯ್ ತರ್ ವಿಲ್ಲ್ ಕೆಲ್ಲ್ಯಾ ವ್ಯಕ್ತಿಚ್ಯಾ ಮರ್ಣಾಚಿ ಸರ್ಟಿಫಿಕೇಟ್ ಹಾಜರ್ ಕರ್ನ್ ಅರ್ಜಿ ದಿಂವ್ಚಿಂ.
