ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
ಪ್ರಸ್ತಾವನ್:
ಹ್ಯಾ ದೇಶಾಂತ್ ಅಮಿಂ ಅಮ್ಚ್ಯೊ ಅಸ್ತಿ ಕರ್ತಾಂವ್ ತರೀ ಮುಳಾವ್ಯಾ ರೀತಿನ್ ಪಳೇಂವ್ಚೆ ತರ್ ಹಿ ಸಗ್ಳಿ ಅಸ್ತ್ ಸರ್ಕಾರಾಚಿ ಅಸ್ತ್, ಮ್ಹಳ್ಳ್ಯಾರ್ ಸರ್ಕಾರಾಕ್ ಸಾರ್ವಜನಿಕ್ ಗರ್ಜಾಂಕ್ ಅಮ್ಚ್ಯಾ ಜಾಗ್ಯಾಚಿ ಗರ್ಜ್ ಅಸಾ ಮ್ಹಣ್ ಭೊಗ್ತಾ ತರ್ ಅಮ್ಚಿ ಅಸ್ತ್ ತಿ ಗರ್ಜ್ ಮುಕಾರ್ ದವರ್ನ್ ಸ್ವಾದಿನ್ ಕರ್ಯೆತಾ. ಪುಣ್ ಸರ್ಕಾರಾನ್ ಸ್ವಾದಿನ್ ಕರ್ಚ್ಯಾ ಪಯ್ಲೆಂ ತಾಕಾ ಸರಿ ಜಾಲ್ಲಿ ಪ್ರಕ್ರೀಯ ಜ್ಯಾರಿ ಕರ್ನ್ ಸ್ವಾದಿನ್ ಕರುಂಕ್ ಜಾಯ್ ಶಿವಾಯ್ ತಾಕಾ ಖುಶಿ ಅಸಾ ತಶೆಂ ಕರುಂಕ್ ಸಾದ್ಯ್ ನಾಂ. ಹ್ಯಾ ಸಂದರ್ಬಾರ್ ತಿ ಅಸ್ತ್/ಭುಂಯ್ ಸಾರ್ವಜನಿಕ್ ಗರ್ಜೆ ಖಾತಿರ್ ಮಾತ್ರ್ ಸ್ವಾದಿನ್ ಕರ್ಯೆತಾ ಅನಿಂ ಭುಂಯ್/ಅಸ್ತಿಚ್ಯಾ ಧನ್ಯಾಕ್ ಪರಿಹಾರ್ ದೀಂವ್ಕ್ ಅಸಾ. ಅಮಿಂ ಕರ್ನಾಟಕ್ ರಾಜಾಂತ್ ಜಿಯೆವ್ನ್ ಅಸಾಂವ್ ದೆಕುನ್ ಹಾಂಗಾಸರ್ ಹ್ಯಾ ರಾಜ್ಯಾಂತ್ ಸರ್ಕಾರಾನ್ ಅಮ್ಚಿ ಅಸ್ತ್ ಸಾರ್ವಜನಿಕ್ ಗರ್ಜೆಕ್ ಖಂಯ್ಚಾ ರೀತಿನ್ ಸ್ವಾದಿನ್ ಕರ್ಯೆತ್ ಮ್ಹಳ್ಳೆವಿಶಿಂ ಜಾಣಾ ಜಾಂವ್ಚೆಂ ಬರೆಂ.
ಸ್ವಾದಿನ್ ಪ್ರಕ್ರೀಯೆಕ್ ಲಾಗು ಜಾಂವ್ಚಿಂ ಕಾನುನಾ ಅನಿಂ ನೆಮಾಂ:
- ಭೂ ಸ್ವಾದೀನ್ ಕಾಯ್ದೊ, 1894
- ಭೂ ಸ್ವಾದಿನ್ (ಕರ್ನಾಟಕಾಕ್ ವಿಸ್ತಾರಲ್ಲೊ ಅನಿ ತಿದ್ದುಪಡಿ) ಕಾಯ್ದೊ, 1961
- ಭೂ ಸ್ವಾಧಿನ್ (ಕರ್ನಾಟಕ ತಿದ್ದುಪಡಿ ಅನಿಂ ಲಗ್ತಿಜಾಲ್ಲೊ) ಕಾಯ್ದೊ, 1967
- ಭೂ ಸ್ವಾಧಿನ್ (ಕರ್ನಾಟಕ ತಿದ್ದುಪಡಿ) ಕಾಯ್ದೊ, 1988
- ಕರ್ನಾಟಕ ಭೂ ಸ್ವಾಧಿನ್ (ಕಂಪೆನಿ) ಕಾಯ್ದೊ, 1973
- ಕೆ. ಐ. ಡಿ. ಬಿ. ಕಾಯ್ದೊ, 1966
- ಕೆ. ಐ. ಡಿ. ಬಿ. ನಿಯಮಾವಳಿಂ 1969
- ಕೆ. ಐ. ಡಿ. ಬಿ ನೆಮಾಂ, 1966
ಸ್ವಾಧಿನ್ ಪ್ರಕ್ರೀಯಾ:
ಕಲಂ 4, ಭೂ ಸ್ವಾಧಿನ್ ಕಾಯ್ದೊ, 1894 ಪ್ರಕಾರ್- ಸುರ್ವಿಲೆಂ ಪರ್ಗಟ್ ಕಳವ್ಣೆ ದ್ವಾರಿ ಭೂ ಸ್ವಾಧಿನ್ ಪ್ರಕ್ರೀಯ ಅರಂಭ್ ಕರ್ಚಿ. ಮ್ಹಳ್ಯಾರ್, ತ್ಯಾ ಭುಂಯ್ಚೆರ್ ಅಧಿಕಾರ್ ಅಪ್ಣಾಯಿಲ್ಲ್ಯಾ ಸರ್ಕಾರಾನ್, ಖಂಯ್ಸರ್ ಸಾರ್ವಜನಿಕ್ ಗರ್ಜೆಕ್/ಸರ್ಕಾರಾಚ್ಯಾ ಪರ್ವಣ್ಗೆನ್ ಸ್ಥಾಪಿತ್ ಕರ್ಚ್ಯಾ ಕಂಪೆನಿಕ್ ಭುಂಯ್ ಗರ್ಜ್ ಅಸಲ್ಲೆ ವೇಳಿಂ ಅಧಿಕ್ರತ್ ರೀತಿನ್ ಪ್ರಕಟನ್ ಕರ್ನ್, ಉಣ್ಯಾರ್ ಉಣೆಂ ದೋನ್ ಪ್ರಾದೇಶಿಕ್ ಸದಾಂ (ಡ್ಯೆಲಿ) ಪ್ರಕಟ್ ಜಾಂವ್ಚಾ ಪತ್ರಾನಿಂ (ಹಾಂತ್ಲೆಂ ಎಕ್ ಪತ್ರ್ ಪ್ರಾದೇಶಿಕ್ ಭಾಶೆಚೆಂ ಜಾಂವ್ಕ್ ಜಾಯ್) ಪರ್ಗಟ್ ಕರುಂಕ್ ಜಾಯ್ ಅನಿಂ ಜಿಲ್ಲ್ಯಾಚಾ ಕಲೆಕ್ಟರಾನ್ ಹ್ಯಾ ವಿಶ್ಯಾಂತ್ ಸಾರ್ವಾಜನಿಕ್ ಅವಗಾಹನೆಕ್ ಯೆಂವ್ಚ್ಯಾ ಜಾಗ್ಯಾನಿಂ ನೋಟಿಸಾಂ ಘಾಲ್ನ್ ತ್ಯಾ ಪದೇಶಾಚ್ಯಾ ಲೊಕಾಂಚ್ಯಾ ಗಮನಾಕ್ ಹಾಡುಂಕ್ ಜಾಯ್.
ಕರ್ನಾಟಕಾ ರಾಜ್ಯ್ ಸರ್ಕಾರಾನ್ ಹ್ಯಾ ಕೇಂದ್ರೀಯಾ ಕಾಯ್ದ್ಯಾಕ್ ಥೊಡೆಂ ತಿದ್ದುಪಡಿ (ತಿದ್ವಣ್) ಹೆಂ ಪರಿ ಕೆಲಾಂ-
- ಪರ್ಗಟ್ಣೆಂತ್ ಸರ್ಕಾರಾನ್ ವ ಸರ್ಕಾರಾಚ್ಯಾ ಕುಶಿನ್ ಥಾವ್ನ್ ಪ್ರಕಟಣ್ ದೀಂವ್ಚ್ಯಾ ಅಧಿಕಾರಿನ್ ಖಂಯ್ಚಾ ಗರ್ಜೆಕ್ ಭೂ ಸ್ವಾದಿನ್ ಕರ್ತಾತ್, ಸ್ವಾದೀನ್ ಕರ್ಚ್ಯಾ ಭುಂಯ್ಚೆ ಸರ್ವೆ ನಂಬರ್, ಅನಿಂ ಒಟ್ಟುಕ್ ಕಿತ್ಲಿ ಭುಮಿ ಸ್ವಾದೀನ್ ಕರ್ತಾತ್ ಮ್ಹಳ್ಳೆ ವಿಶಿ ಲೇಕ್ ದೀಂವ್ಕ್ ಜಾಯ್.
- ಪರ್ಗಟ್ಣೆಂತ್- ಭೂ ಮಾಲಿಕಾನಿಂ ಭೂಸ್ವಾದಿನಾಕ್ ವಿರೋದ್ಪಣ್ ಕರುಂಕ್ ಅಸ್ಚಿ ನಿಮಾಣಿ ತಾರೀಕ್ (ಪರ್ಗಟ್ ಕರ್ನ್ 30 ದೀಸಾಂಕ್ ಉಣೆಂ ನಾಸ್ತಾಂ) ಅನಿಂ ಖಂಯ್ಚಾ ರೀತಿನ್ ವಿರೋದ್ಪಣ್ ಕರ್ಯೆತಾ ಮ್ಹಳ್ಳೆವಿಶಿ ಅಸೊಂಕ್ ಜಾಯ್.
- ಸರ್ಕಾರಾನ್/ಜಿಲ್ಲಾಧಿಕಾರಿನ್ ಪ್ರಸ್ತುತ್ ಭೂ ಸ್ವಾದಿನಾಚಿ ತನ್ಕಿ ಕರ್ನ್ ವರ್ದಿ ದೀಂವ್ಕ್ ನೆಮ್ಲಲ್ಯಾ ಅಧಿಕಾರಿನ್ 3 (ತೀನ್) ಮಹಿನ್ಯಾಂ ಭಿತರ್ ವ ಜಿಲ್ಲಾಧಿಕಾರಿಚ್ಯಾ ಪರ್ವಣ್ಗೆನ್ ಚಡ್ತಿಕ್ ತೀನ್ ಮಹಿನೆಂ ಮ್ಹಳ್ಯಾರ್ ಒಟ್ಟುಕ್ 6 ಮಹಿನ್ಯಾ ಭಿತರ್ ವರ್ದಿ ಜಿಲ್ಲಾಧಿಕಾರಿಕ್ ಸಮೊರ್ ದಾಖಲ್ ಕರುಂಕ್ ಜಾಯ್. ಜಿಲ್ಲಾಧಿಕಾರಿನ್ ತಿ ವರ್ದಿ ತಾಚ್ಯಾ ಸೂಚನಾಂ ಸಾಂಗಾತಾ ಸಂಭಂದ್ ಜಾಲ್ಲ್ಯಾ ಸರ್ಕಾರಾಕ್ ಪಾವಿತ್ ಕರುಂಕ್ ಜಾಯ್.
- ಸ್ವಾದೀನ್ ಜಾಂವ್ಚ್ಯಾ ಭುಂಯ್ಚ್ತಾ ಮಾಲಿಕಾಕ್ ವಯಕ್ತಿಕ್ ರೀತಿನ್ ಜಿಲ್ಲಾಧಿಕಾರಿನ್ ನೋಟಿಸ್ ಜ್ಯಾರಿ ಕರುಂಕ್ ಜಾಯ್.
ಭೂ ಸ್ವಾಧಿನಾಕ್ ವಿರೋದ್ಪಣ್:
ಕಲಂ 5ಎ ಪ್ರಕಾರ್, ಭೂಮಾಲಿಕಾಕ್ ಅಪ್ಲ್ಯಾ ಭೂಸ್ವಾಧೀನ್ ಕರ್ಚ್ಯಾ ವಿಶಿಂ ಕಿತೆಂಯ್ ಅಡ್ಕಳ್/ ವಿರೋದ್ಪಣ್ ಅಸಾ ತರ್, ತೆಂ ವಿರೋದ್ಪಣ್ ಖಂಯ್ಚಾ ರೀತಿಚೆಂ ಮ್ಹಳ್ಳ್ಯಾ ವಿಶಿಂ ಸ್ಪಷ್ಟ್ ಬರವಣಿಗೆಂತ್ ಜಿಲ್ಲಾಧಿಕಾರಿಕ್ ಪಾವಿತ್ ಕರ್ಚೆಂ. ಹ್ಯಾ ವಿರೋದ್ಪಣಾಕ್, ಜಿಲ್ಲಾಧಿಕಾರಿನ್ ನಯ್ಸರ್ಗಿಕ್ ನ್ಯಾಯಾ ಪ್ರಕಾರ್ ಭೂಮಾಲಿಕಾಕ್ ಅಯ್ಕೊನ್ (ಭೂಮಾಲಿಕಾಕ್ ಪ್ರತ್ಯಕ್ಷ್ ವಾ ತಾಚೆ ತರ್ಫೆನ್ ಹಾಜರ್ ಜಾಲ್ಲ್ಯಾ ವ್ಯಕ್ತಿಕ್), ಮುಕ್ಲಿ ಗರ್ಜೆಚಿ ತನ್ಕಿ ಹ್ಯಾ ದಿಶೆನ್ ಕರ್ನ್, ತಾಚಿ ವರ್ದಿ ಅನಿಂ ಅಡ್ಕಳಿ ಕಿತೆಂಯ್ ಅಸಾತ್ ತರ್ ತ್ಯೊ ಸರ್ವ್ ಸರ್ಕಾರಾಚ್ಯಾ ಅವಗಹನಾಕ್ ಧಾಡ್ನ್ ದೀಂವ್ಚೆ. ಹ್ಯಾ ದೀಶೆನ್ ಸರ್ಕಾರಾಚೊ ನಿರ್ಣಯ್ ಅಂತಿಮ್.
ಭೂಸ್ವಾಧೀನಾಕ್ ಒಳಗ್ ಜಾಲ್ಲ್ಯಾಕ್ ಪರಿಹಾರ್:
ಜಿಲ್ಲಾಧಿಕಾರಿನ್ ವ ಭೂಸ್ವಾಧಿನ್ ಅಧಿಕಾರಿನ್ ತನ್ಕೆಕ್ ನಮಿಯಾರಲ್ಲ್ಯಾ ದಿಸಾ ಸ್ವಾಧಿನ್ ಜಾಂವ್ಕ್ ಅಸ್ಚ್ಯಾ ಭುಂಯ್ಚಾ ಮ್ಹಾಲಕಾಚೆಂ ವಿರೋದ್ಪಣಾಚಿ ತನ್ಕಿ ಕರ್ನ್ ಜಾಗ್ಯಾಚಾ ಧನ್ಯಾಕ್ ಹ್ಯಾ ಪರಿಂ ಪರಿಹಾರ್ ದೀಂವ್ಕ್ ಅಸಾ-
- ತ್ಯಾ ಜಾಗ್ಯಾಚೆಂ ನೀಜ್ ಮೋಲ್;
- ಜಿಲ್ಲಾಧಿಕಾರಿ/ಸ್ವಾಧಿನ್ ಅಧಿಕಾರಿಚ್ಯಾ ಅಭಿಪ್ರಾಯೆ ಪ್ರಕಾರ್ ದೀಂವ್ನ್ ಜಾಯ್ ಜಾಲ್ಲೊ ಐವಜ್;
- ಎಕಾ ಜಾಗ್ಯಾಕ್ ಸಭಾರ್ ವ್ಯಕ್ತಿಂಚೊ ವಾಂಟೊ ಅಸಾ ತರ್ ಸಕ್ಕಡಾಂಕ್ ಪಾವಿತ್ ಜಾಂವ್ಚೆ ಬರಿಂ ಪಳೆಂವ್ಚೆ
ಹೊ ಪರಿಹಾರಾಚೊ ವಾವ್ರ್ ಸ್ವಾಧೀನ್ ಕರುಂಕ್ ಪರ್ವಣ್ಗಿ ದಿಲ್ಲ್ಯಾ ಸರ್ಕಾರಾಚ್ಯಾ ಪರ್ವಣ್ಗೆ ಮುಳಾಂತ್ ಕರ್ಚೆ.
ಪ್ರಕ್ರೀಯಾಚಿ ಅವ್ದಿ:
ಅಧಿಕ್ರತ್ ಪರ್ಗಟ್ಣಿ ಜಾಲ್ಲ್ಯಾ ದೋನ್ (2) ವರ್ಸಾಂಚ್ಯಾ ಅವ್ದೆ ಭಿತರ್ ಜಿಲ್ಲಾಧಿಕಾರಿನ್ ಹಿ ಭೂಸ್ವಾಧೀನ್ ಪ್ರಕ್ರೀಯಾ ಕರುಂಕ್‌ಜಾಯ್ (ಭೂಸ್ವಾಧೀನ್ ಅನಿಂ ಪರಿಹಾರ್ ದೀಂವ್ಚೊ ವಾವ್ರ್). ಜರ್ ಹ್ಯಾ ದೋನ್ ವರ್ಸಾಂಚ್ಯಾ ಅವ್ದೆ ಭಿತರ್ ಪರಿಹಾರ್ ಭೂ ಮಾಲಿಕಾಕ್ ಮೆಳನಾ ತರ್ ಸ್ವಾಧೀನಾಚಿ ಸಗ್ಳಿ ಪ್ರಕ್ರೀಯಾ ವ್ಯರ್ಥ್ ಜಾತಾ ಅನಿ ತಿ ನುಲ್ಲ್ ಜಾತಾ. (ಕೋಡ್ತಿ ಥಾವ್ನ್ ಹ್ಯಾ ಪ್ರಕ್ರೀಯಾ ತಾತ್ಕಾಲಿಕ್ ಸ್ಥಬ್ದ್ ಕರುಂಕ್ ಅದೇಶ್ ದಿಲಾ ತರ್ ವಯ್ರ್ ಕಾಣ್ಸಿಲ್ಲಿಂ ದೊನ್ ವರ್ಸಾಂಚಿ ಅವ್ದಿ ಲಾಗು ಜಾಯ್ನಾ).
ಕೋಡ್ತಿಚೆಂ ಮೇಟ್:
ಭೂ ಮಾಲಿಕ್ ಜರ್ ಜಿಲ್ಲಾಧಿಕಾರಿನ್/ ಭೂಸ್ವಾಧೀನ್ ಅಧಿಕಾರಿನ್ ದಿಲ್ಲ್ಯಾ ಪರಿಹಾರಾಚ್ಯಾ ಐವಜಾ ವಿಶಿಂ ಅಸಮಾಧಾನ್ ವ ಜಾಗ್ಯಾಚೆಂ ಮಾಪ್ ಮೆಜಾಪಾ ವಿಶಿಂ ಅಸಮಾಧಾನ್ ವ ಕೊಣಾಕ್ ಪರಿಹಾರಾಚೊ ಐವಜ್ ಪಾವಿತ್ ಕರ್ಚೊ ಮ್ಹಳ್ಳೆ ವಿಶಿಂ ಅಸಮಾಧಾನ್ ವ ಪರಿಹಾರಾಚ್ಯಾ ವಾಂಟ್ಯಾವಿಶಿಂ ವ್ಯಕ್ತಿ ಮಧೆಂ ಅಸ್ಚೊ ಭಿನ್ನಾಬಿಪ್ರಾಯ್- ಹ್ಯಾ ವಿಶಿಂ ಪರಿಹಾರಾಚೊ ಐವಜ್ ತಿರಸ್ಕಾರ್ ಕೆಲ್ಲ್ಯಾ ವ್ಯಕ್ತಿನ್, ಜಿಲ್ಲಾಧಿಕಾರಿಕ್ ಅರ್ಜೆ ಮುಕಾಂತ್ರ್ ಕೋಡ್ತಿಕ್ ಹಸ್ತಾಂತರ್ ಕರುಂಕ್ ವಿನಂತಿ ಕರ್ಚಿ. ಹ್ಯಾ ಸಂದರ್ಬಾರ್ ಕಿತ್ಯಾ ಪಾಸತ್ ಪರಿಹಾರಚೊ ಐವಜ್ ತಿರಸ್ಕಾರ್ ಕರ್ತಾತ್ ಮ್ಹಳ್ಳ್ಯಾ ವಿಶಿಂ ಅರ್ಜೆಂತ್ ಕಳಂವ್ಕ್‌ಜಾಯ್.
ಹಿ ಅರ್ಜಿ ಜಿಲ್ಲಾಧಿಕಾರಿನ್ ಪರಿಹಾರಾಚೊ ಐವಜ್ ಪರ್ಗಟ್ ಕೆಲ್ಲ್ಯಾ 6 ಹಪ್ತ್ಯಾಂ ಭಿತರ್ ದೀಂವ್ಕ್ ಜಾಯ್. ಜರ್ ಪರಿಹಾರ್ ಪರ್ಗಟ್ ಕರ್ತಾನಾ ಸಂಭಂಧ್ ಜಾಲ್ಲೆ ವ್ಯಕ್ತಿ ಹಾಜರ್ ನಾತಲ್ಲೆ ತರ್ ಪರ್ಗಟ್ ಕೆಲ್ಲ್ಯಾ ಪರಿಹಾರಾಚಾ ಐವಜಾ ವಿಶಿಂ ಜಿಲ್ಲಾಧಿಕಾರಿನ್ ತಕ್ಷಣ್ ದಿಲ್ಲೆಂ ನೋಟಿಸ್ ಪಾವಲ್ಲ್ಯಾ 6 ಹಪ್ತ್ಯಾ ಭಿತರ್ ವ 6 ಮಹಿನ್ಯಾ ಭಿತರ್. ಹಾಂಗಾಸರ್ ಖಂಯ್ಚಿ ಅವ್ದಿ ಪಯ್ಲಿ ಜಾತಾ ತ್ಯಾ ಅವ್ದೆ ಭಿತರ್.
ಕರ್ನಾಟಕಾಚ್ಯಾ ತಿದ್ದುಪಡಿ ಪ್ರಕಾರ್-
- ಅಪ್ಲಿಕೇಶನ್/ಅರ್ಜಿ ಪರಿಹಾರಾಚ್ಯಾ ಐವಜಾ ವಿಶಿಂ ಧಾಡಲ್ಲೆಂ ನೋಟಿಸ್ ಪಾವಲ್ಲ್ಯಾ 90 ದೀಸಾಂ ಭಿತರ್ ಘಾಲುಂಕ್ ಜಾಯ್.
- ಜಿಲ್ಲಾಧಿಕಾರಿನ್ ತಾಕಾ ದಿಲ್ಲಿ ಅರ್ಜಿ 90 ದೀಸಾಂ ಭಿತರ್ ಕೋಡ್ತಿಕ್ ಧಾಡ್ನ್ ದೀಂವ್ಕ್ ಜಾಯ್.
- ಜರ್ ಜಿಲ್ಲಾಧಿಕಾರಿ ತಾಕಾ ದಿಲ್ಲಿ ಅರ್ಜಿ 90 ದೀಸಾಂ ಭಿತರ್ ಕೋಡ್ತಿಕ್ ದಾಕಲ್ ಕರ್ನಾ ತರ್, ಅರ್ಜಿದಾರಾನ್ ಕೋಡ್ತಿಕ್ ಅರ್ಜಿ ಘಾಲ್ನ್ ಜಿಲ್ಲಾಧಿಕಾರಿನ್ ಕೋಡ್ತಿಕ್ ತಾಚಿ ಅರ್ಜಿ ಪವಿತ್ ಕರ್ಚೆ ಬರಿಂ ವಿನಂತಿ ಕರ್ಯೆತಾ. ಕೋಡ್ತ್ ಜಿಲ್ಲಾಧಿಕಾರಿಕ್ ವೇಳ್ ನಮಿಯಾರ್ನ್ ತ್ಯಾ ವೆಳಾ ಭಿತರ್ ತಾಚೊ ದಾವೊ ದಾಖಲ್ ಕರುಂಕ್ ಅದೇಶ್ ದಿತಾ.
ಪರಿಹಾರ್ ಲೇಖ್ ಕರ್ತಾನಾ ಕೋಡ್ತಿನ್ ಗಮನಾಂತ್ ದವರ್ಚ್ಯೊ ಸಂಗ್ತಿ;
ಪರಿಹಾರಾ ಖಾತಿರ್ ಕೊಡ್ತಿಕ್ ದಾಕಲ್ ಜಾಲ್ಲ್ಯಾ ದಾವ್ಯಾಂತ್ ಕೋಡ್ತ್ ಹ್ಯೊ ಸಕ್ಯೆಲೊ ಸಂಗ್ತಿ ಗಮನಾಕ್ ಘೆತಾ-
- ಪರ್ಗಟ್ಣಿ ಕೆಲ್ಲ್ಯಾ ದೀಸಾ ತ್ಯಾ ಭುಂಯ್ಕ್ ಅಸಲ್ಲಿ ಮಾರ್ಕೆಟಿಚೆಂ ಮೋಲ್.
- ಜರ್ ತಿ ಭುಂಯ್ ಸ್ವಾಧಿನ್ ಕರ್ತಾನಾ ತ್ಯಾ ಭುಂಯ್ಚೆರ್ ಅಸಲ್ಲೆ ರೂಕ್ ಝಡಾ ವ ಧಾನಿ ವ ಹೆರ್ ಖಂಯ್ಚೆಯ್ ಫಳ್ ದೀಂವ್ಚೆ ರೂಕ್ ಕಾತರ್ಚೆ ದ್ವಾರಿಂ ಜಾಲ್ಲೊ ನಷ್ಟ್.
- ಸ್ವಾಧಿನ್ ಕರುಂಕ್ ಅಸಲ್ಲಿ ಭುಂಯ್ ಸ್ವಾಧಿನ್ ಕರ್ತಾನಾ ತ್ಯಾ ಭುಂಯ್ಕ್ ಲಾಗೊನ್ ಅಸಲ್ಲ್ಯಾ ಹೆರ್ ಭುಂಯ್ಕ್ ಜಾಲ್ಲ್ಯಾ ನಷ್ಟಾಚೊ ಐವಜ್.
- ಸ್ವಾಧಿನ್ ಕರುಂಕ್ ಅಸಲ್ಲಿ ಭುಂಯ್ ಸ್ವಾಧಿನ್ ಕರ್ತಾನಾ ತ್ಯಾ ಭುಂಯ್ಕ್ ಲಾಗೊನ್ ಅಸಲ್ಲ್ಯಾ ಹೆರ್ ಭುಂಯ್ಕ್ ಜಾಂವ್ ಸ್ಥಿರಾಸ್ತಿ ವ ಚರಾಸ್ತಿಕ್ ಜಾಲ್ಲೊ ನಷ್ಟ್.
- ತಿ ಭುಂಯ್ ಜಿಲ್ಲಾಧಿಕಾರಿನ್ ಭೂಸ್ವಾಧಿನ್ ಪ್ರಕ್ರೀಯೆ ಮುಳಾಂತ್ ಸ್ವಾಧಿನ್ ಕೆಲ್ಲೆ ವರ್ವಿಂ ಭೂಮಾಲಿಕಾಕ್ ತಾಚೆಂ ಘರ್ ಬದ್ಲೊಂಕ್ ಜಾಲ್ಲೊ ಖರ್ಚ್, ಬಿಸ್ನೆಸ್ ಸ್ಥಳಾಂತರ್ ಕರುಂಕ್ ಜಾಲ್ಲೊ ಪ್ರಾಮಾಣಿಕ್ ಖರ್ಚ್ ಗಮಾನಾಂತ್ ಘೆತಾ.
- ಭೂಸ್ವಾಧಿನಾಚ್ಯಾ ಪ್ರಕ್ರೀಯೆ ಅನಿ ನೀಜ್ ಸ್ವಾಧೀನ್ ಕರುಂಕ್ ಕಾಣ್ಘೆಲ್ಲ್ಯಾ ಅವ್ದೆಂತ್ ಬರ‍್ಯಾ ಇರಾದ್ಯಾನ್ ಪ್ರೋಫಿಟಾಂತ್ ಜಾಲ್ಲೊ ನಷ್ಟ್.
ಸ್ವಾಧಿನ್ ಜಾಲ್ಲ್ಯಾ ಭುಂಂಯ್ಕ್ ಪ್ರಸ್ತುತ್ ಮಾರ್ಕೇಟಿಂತ್ ಅಸಲ್ಲ್ಯಾ ಮೋಲಾ ಸಾಂಗಾತಾ ಭೂಸ್ವಾಧೀನ್ ಕರುಂಕ್ ದಿಲ್ಲ್ಯಾ ಪರ್ಗಟ್ಣೆಚ್ಯಾ ದಿಸಾ ಥಾವ್ನ್ ನೀಜ್ ಸ್ವಾಧೀನ್ ಕೆಲ್ಲ್ಯಾ ದಿಸಾ ಪರ‍್ಯಾಂತ್ ವರ್ಸಾಕ್ ೧೨% ದೀಂವ್ಕ್ ಕೋಡ್ತ್ ಅದೇಶ್ ಕರ್ತಾ. ಸಾಂಗಾತಾಚ್, ಹರೇಕಾ ಭೂಸ್ವಾಧಿನಾಕ್ ಒಳಗ್ ಜಾಂವ್ಚಾ ಭುಂಯ್ಕ್ ಮಾಕೇಟಿಂತ್ ತವಳ್ ಅಸ್ಚ್ಯಾ ಮೋಲಾ ಸಾಂಗಾತಾ ತ್ಯಾ ಭುಂಯ್ಚಾ ಮೋಲಾಚೆ 30 % ಚಡ್ತಿಕ್ ಮೋಲ್ ದೀಂವ್ಕ್ ಅದೇಶ್ ದಿತಾ. ಪರ್ಗಟ್ಣಿ ಜಾಲ್ಲ್ಯಾ ಉಪ್ರಾಂತ್ ಕೆಲ್ಲ್ಯಾ ಉದರ್ಗತಿಚೆಂ ಲೇಖ್ ಪರಿಹಾರ್ ಕರ್ತಾನಾ ಕೋಡ್ತ್ ಗಮಾನಾಕ್ ಘೆನಾಂ.
ಜರ್ ಭೂಸ್ವಾಧೀನ್ ಜಾಲ್ಲ್ಯಾ ಭುಂಯ್ಚಾ ಪರಿಹಾರ್ ಐವಜಾಚಾ ವಾಂಟ್ಯಾ ವಿಶಿಂ ಅಸ್ಚೊ ತಕ್ರಾರ್ ಜಿಲ್ಲಾಧಿಕಾರಿ ಕೋಡ್ತಿಕ್ ಹಸ್ತಾಂತರ್ ಕರ್ತಾ.
