ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
ಪ್ರಸ್ತಾವನ್:
ಸಾಮಾನ್ಯ್ ಜಾವ್ನ್ ಅಮ್ಚೆ ಸೆಜಾರಿ ವಾ ಅಮ್ಚೆ ವಿರೋದ್ ಅಸ್ಚೆ ಅಮ್ಕಾಂ ವಿವಿದ್ ರೀತಿನ್ ಅನ್ಯಾಯ್ ಕರ್ನ್ ನಷ್ಟ್ ಕರುಂಕ್ ಪ್ರಯತನ್ ಕೆಲ್ಲ್ಯಾ ವೆಳಿಂ ಅಮಿಂ ಕೊಡ್ತಿಕ್ ವಚುನ್ ಪರಿಹಾರ್ ಅಪ್ಣಾಂವ್ಕ್ ಪಯತನ್ ಕರ್ತಾಂವ್. ಥೊಡ್ಯಾ ಅಮ್ಚ್ಯಾ ಪ್ರಯತ್ನಾಂತ್ ಅಮ್ಕಾಂ ಸಫಲತಾ ಮೆಳ್ತಾ ತರ್ ಥೊಡ್ಯಾಂತ್ ಅಮ್ಕಾಂ ಸಫಲತಾ ಮೆಳನಾ. ಜಾಂವ್ಕ್ ಪುರೊ ಥೊಡೆ ಪಾವ್ಟಿಂ ಅಮ್ಚೆಲಾಗಿಂ ತಾಣಿಂ ಕೆಲ್ಲೊ ಅನ್ಯಾಯ್ ರುಜು ಕರುಂಕ್ ಸಾರ್ಕ್ಯೊ ಸಾಕ್ಷಿ ಅಸಾನಾಂತ್ ವ ಅಮ್ಚ್ಯಾ ಸಾಕ್ಷಿಂಕ್ ವಿರೋದ್ ಪಾಡ್ತಿಚೆ ವಿಕ್ತ್ಯಾಕ್ ಘೆವ್ನ್ ಅಮ್ಕಾಂ ವಿರೋದ್ ಕರ್ತಾತ್ ಮ್ಹಳ್ಳೆಂ ಭೊಗಾಪ್ ಅಸಾ. ಪುಣ್ ಥೊಡೆ ಪಾವ್ಟಿಂ ಅಮ್ಚೆಲಾಗಿಂ ಸಾಕ್ಷೊ ಅಸಾತ್ ಅನಿ ಅಮಿಂ ಕೊಡ್ತಿಂತ್ ಅಮ್ಕಾಂ ಜಾಲ್ಲೊ ನಷ್ಟ್ ರುಜು ಕರುಂಕ್ ಸಕ್ಲ್ಯಾರಿ ಅಮ್ಕಾ ಜಾಲ್ಲೊ ನಷ್ಟ್ ಪರಿಹಾರಾ ಮುಕಾಂತ್ರ್ ಅಮಿಂ ಅಪ್ಣಾಂವ್ಕ್ ಸಕನಾಂವ್. ತರ್ ಅಶೆಂ ಕಿತ್ಯಾಕ್?
ಜಾಲ್ಲ್ಯಾ ನಷ್ಟಾಕ್ ಕೊಡ್ತಿ ಥಾವ್ನ್ ಪರಿಹಾರ್ ಅಪ್ಣಾಂವ್ಕ್ ಹಿ ನಿಯಾಮ್ ಅಸಾತ್-
- ಎಕಾ ವ್ಯಕ್ತಿನ್ ಅನ್ಯೇಕ್ಲ್ಯಾ ವಿರೋದ್ ಅನ್ಯಾಯ್ ವ ಚೂಕ್ ಘಡಿತ್ ಕರುಂಕ್ ಜಾಯ್( There should be a wrongful act committed by a person).
- ತಿ ಚೂಕ್/ ಅನ್ಯಾಯಾಚೆಂ ಘಡಿತ್ ಕಾನುನಿ ದ್ರಷ್ಟೇಚ್ಯಾ (Legal damage)ಮುಳಾಂತ್ ನಷ್ಟಾಕ್ ಒಳಗ್ ಜಾಂವ್ಚೆ ತಸಲೆಂ ಜಾಂವ್ಕ್ ಜಾಯ್ (The wrongful act must result in legal damage to another person).
- ತಿ ಚೂಕ್/ ಅನ್ಯಾಯಾಚೆಂ ಘಡಿತಾಚೊ ಸ್ವಭಾವ್ ಕಾನುನಾಚ್ಯಾ ಮುಳಾಂತ್ ಪರಿಹಾರ್ (Legal Remedy) ಅಪ್ಣಾಂವ್ಕ್ ಸೂಕ್ತ್ ಜಾಲ್ಲೆಂ ಜಾಂವ್ಕ್ ಜಾಯ್ (The wrongful act must be of such a nature as to give rise to a legal remedy in the form of an action for damages).
ಸೊಂಪ್ಯಾ ಉತ್ರಾನಿಂ ಸಾಂಗ್ಚೆ ತರ್ ತೆಂ ಘಡಿತ್/ಚೂಕ್(Wrongful Act) ಕಾನುನಿ ದ್ರಷ್ಟೇನ್ ಎಕಾ ವ್ಯಕ್ತಿಕ್ ಅಸ್ಚ್ಯಾ ಹಕ್ಕಾಚೆಂ (Legal Right) ಉಲ್ಲಂಘನ್ ಜಾಂವ್ಕ್ ಜಾಯ್. ದಾಖ್ಲ್ಯಾಕ್ ದೀಂವ್ಚೆ ತರ್ ಜರ್ ಎಕ್ ವ್ಯಕ್ತಿ ಜಾತಿಚಾ ಕಾರಣಾನ್ ಅನ್ಯೇಕಾ ವ್ಯಕ್ತಿ ಸಾಂಗಾತಾ ಜೆವಾಣ್ ಖಾಣ್ ಘೆಂವ್ಕ್ ನೆಗಾರ್ ಕರ್ತಾ ತರ್ ತೆಂ ಕಾನುನಿ ದ್ರಷ್ಟೇನ್ ಚೂಕ್ ಜಾಯ್ನಾ ಬದ್ಲಾಕ್ ಸಮಾಜಿಕ್ ಅನಿಂ ಅತ್ಮೀಕ್ ಚೂಕ್ ಜಾಂವ್ಕ್ ಪಾವ್ತಾ. ಪುಣ್ ಜರ್ ಎಕ್ ವ್ಯಕ್ತಿ ತಾಚೊ ಸೆಜಾರಿ ಚಲೊನ್ ವಚುಂಕ್ ಕಾನುನಿ ರೀತಿನ್ ದಿಲ್ಲ್ಯಾ ವಾಟೆರ್ ಅಡ್ ಕರ್ನ್ ತಾಕಾ ಅನ್ಯಾಯ್ ಕರ್ತಾ ತರ್ ತಿ ಕಾನುನಿ ದ್ರಷ್ಟೇನ್ ಚೂಕ್ ಜಾತಾ ಅನಿಂ ವಿರೋದ್ ಪಾಡ್ತಿಚ್ಯಾನ್ ಕೊಡ್ತಿ ಥಾವ್ನ್ ಪರಿಹಾರ್ ಅಪ್ಣಾವ್ಯೆತ್. ಕಾನುನಿ ದ್ರಷ್ಟೇಚಿ ಚೂಕಿಂತ್ ಕಿತೆಂ ಕರಿಜಾಯ್ ಅಸಲ್ಲೆಂ ತೆಂ ಕರ್ನಾತಲ್ಲೆಂ ಘಡಿತ್ ಸಮೇತ್ ಯೆತಾ.
ಹ್ಯಾ ದಿಶೇನ್ ದೋನ್ ಉತ್ಪ್ರೇಕ್ಷ್ಯಾ ಅಸಾತ್-
- ನಷ್ಟಾವಿಣೆಂ ಕಾನುನಾ ಹಕ್ಕಾಚೆ ಉಲ್ಲಂಘನ್ ಜಾಲ್ಲೆಂ ಘಡಿತ್/ಚೂಕ್
- ಕಾನುನಾ ಹಕ್ಕಾಚ್ಯಾ ಉಲ್ಲಂಘನಾ ಭಾಯ್ರ್ ಜಾಲ್ಯಾ ಘಡಿತ್/ಚೂಕಿ ದ್ವಾರಿ ಜಾಲ್ಲೊ ನಷ್ಟ್
1. ನಷ್ಟಾವಿಣೆಂ ಕಾನುನಾ ಹಕ್ಕಾಚೆ ಉಲ್ಲಂಘನ್ ಜಾಲ್ಲೆಂ ಘಡಿತ್/ಚೂಕ್:
ಎಕಾ ವ್ಯಕ್ತಿಕ್ ಕಾನುನಾಚ್ಯಾ ಮುಳಾಂತ್ ಮೆಳೊಂಕ್ ಜಾಯ್ ಅಸಲ್ಲೆಂ ಹಕ್ಕ್ ಅನ್ಯೇಕಾ ವ್ಯಕ್ತಿನ್ ಖಂಯ್ಚೆಯ್ ಘಡಿತ್ ಕರ್ಚೆ/ಚೂಕ್ ಅದಾರ್ಚೆ ದ್ವಾರಿಂ ವ ಕರಿಜಾಯ್ ಅಸಲ್ಲೆಂ ಕರ‍್ನಾತಲ್ಲ್ಯಾ ವೆಳಿಂ ಅಧಾರಲ್ಲೆ ವೆಳಿಂ ತ್ಯಾ ವ್ಯಕ್ತಿಕ್ ಕಾನುನಾ ಸಕ್ಯೆಲ್ ಅನ್ಯಾಯ್ ಜಾತಾ. ಮ್ಹಳ್ಳ್ಯಾರ್ ಕಾನುನಾ ಮುಳಾಂತ್ ಎಕಾ ವ್ಯಕ್ತಿಚೆ ಹಕ್ಕ್ ಉಲ್ಲಂಘನ್ ಜಾವ್ನ್, ಭಾಯ್ಲ್ಯಾ ದೇಖಿಕ್ ದಿಸ್ಚ್ಯಾ ತಸಲೊ ಅನ್ಯಾಯ್ ಪಯ್ಶ್ಯಾನಿಂ ವ ಹೆರ್ ರೀತಿನ್ ಜಾಂವ್ಕ್ ನಾಂ ಮ್ಹಣ್ ಭೊಗ್ತಾ ತರೀ ತ್ಯಾ ವ್ಯಕ್ತಿನ್ ತಾಕಾ ಜಾಲ್ಲೊ ನಷ್ಟ್ ತಾಚೆಂ ಹಕ್ಕ್ ಉಲ್ಲಂಘನ್ ಕೆಲ್ಲೆ ವ್ಯಕ್ತಿ ಥಾವ್ನ್ ಭರ್ತಿ ಕರುಂಕ್ ಕೊಡ್ತಿ ದ್ವಾರಿ ವಿಚಾರ್ಯೆತ್. ಥೊಡೆ ಕೊಡ್ತಿ ಮುಕಾರ್ ಇತ್ಯರ್ಥ್ ಜಾಲ್ಲೆ ದಾಖ್ಲೆ ದಿಂವ್ಚೆ ತರ್-
ಅಶ್ಬಿ ವಿರೋದ್ ವ್ಯೇಟ್:- ಹ್ಯಾ ದಾವ್ಯಾಂತ್ ಪ್ರತಿವಾದಿ ಎಲೆಕ್ಷನಾಚೊ ಪರಿವೀಕ್ಷಕ್ ಅಫೀಸರ್ (Returning Officer)ಜಾವ್ನಾಸಲ್ಲೊ. ವಾದಿ ಮತ್ ಘಾಲ್ಚೊ ಸಂಪೂರ್ಣ್ ಹಕ್ಕ್ ಅನಿಂ ಅರ್ಹತಾ ಅಸೊನ್ ತಾಚೊ ಮತ್ (ವೋಟ್) ಘಾಲುಂಕ್ ಗೆಲ್ಲ್ಯಾ ವೆಳಿಂ ಪ್ರತಿವಾದಿ ತಾಕಾ ಮತ್ ಘಾಲುಂಕ್ ನೆಗಾರ್ ಕರ್ತಾ. ಪ್ರತಿವಾದಿನ್ ಮತ್ ಘಾಲುಂಕ್ ನಾಂ ತರೀ ತಾಣೆಂ ಮತ್ ಘಾಲುಂಕ್ ಚಿಂತಲ್ಲೊ ಅಭ್ಯರ್ಥಿ ಎಲೆಕ್ಷನಾಂತ್ ಜಯ್ತೆವಂತ್ ಜಾತಾ ಅನಿಂ ವಾದಿಕ್ ಮತ್ ದಿಂವ್ಕ್ ನೆಗಾರ್ ಕೆಲ್ಲೆಂ ತಾಚ್ಯಾ ಅಭ್ಯರ್ಥಿಚೆರ್ ಕಾಂಯ್ ಪರಿಣಾಮ್ ಪಡೊಂಕ್ ನಾಂ. ಪುಣ್ ಕೊಡ್ತ್ ವಾದಿಚೆಂ ಹಕ್ಕ್ ಉಕಲ್ನ್ ದರ‍್ತಾ ಅನಿಂ ಸಾಂಗ್ತಾಕೀ ಹ್ಯಾ ಸಂದರ್ಭಾರ್ ವಾದಿಕ್ ಕಾಂಯ್ ಪಯ್ಶಾನ್ ನಷ್ಟ್ ಜಾಂವ್ಕ್ ನಾಂ ತರೀ ತಾಚ್ಯಾ ಕಾನುನಿ ದ್ರಷ್ಟೇಚ್ಯಾ ಹಕ್ಕಾಚೆಂ ಉಲ್ಲಂಘನ್ ಜಾಲಾಂ ಅನಿಂ ತಾಕಾ ಪ್ರತಿವಾದಿ ಅನಿಂ ಸರ್ಕಾರ್ ಕಾರಣ್ ಮ್ಹಣ್ತಾ.
ಭೀಮ್ ಸಿಂಗ್ ವಿರೋದ್ ಜಮ್ಮು ಅನಿಂ ಕಾಶ್ಮೀರ್(1986)- ಹ್ಯಾ ದಾವ್ಯಾಂತ್ ಜಮ್ಮು ಅನಿಂ ಕಾಶ್ಮೀರಾಚ್ಯಾ ಶಾಸಕಾಕ್ ಪೋಲಿಸಾನಿಂ ತೊ ಅಸೆಂಬ್ಲಿಚ್ಯಾ ಅದಿವೇಶನಾಕ್ ವೆತಾನಾ ತಾಂಚಾ ಚೂಕಿ ವರ್ವಿಂ ಕಯ್ದ್ ಕೆಲೆಂ ಅನಿ ಹಾಜರ್ ಕರುಂಕ್ ಜಾಯ್ ಅಸಲ್ಯಾ ವೆಳಾ ಭಿತರ್ ಮ್ಯಾಜಿಸ್ಟ್ರೇಟಾ ಮುಕಾರ್ ಹಾಜರ್ ಕರುಂಕ್ ನಾಂ. ಹ್ಯಾ ಕಾರಣಾ ಖಾತಿರ್ ತಾಚೊ ಸಂವಿಂಧಾನಾ ಮುಳಾಂತ್ ತಾಕಾ ಅಸಲ್ಲೊ ಹಕ್ಕ್ ಜ್ಯಾರಿ ಕರುಂಕ್ ಅಡ್ಕಳ್ ಜಾಲಿ ಅನಿ ಸಂವಿಂಧಾನಾಚ್ಯಾ ಪರಿಛ್ಛೇದ್ 21 ಚೆಂ ಉಲ್ಲಂಘನ್ ಜಾಲೆಂ. ಹೊ ದಾವೊ ಸುಪ್ರೀಮ್ ಕೊಡ್ತಿಕ್ ವೆಚ್ಯಾ ಪಯ್ಲೆಂ ತಾಕಾ ಸ್ವತಂತ್ರ್ ಕೆಲೆಂ ತರೀ ಕೊಡ್ತಿನ್ ತಾಕಾ ಪಯ್ಶಾನ್ ನಷ್ಟ್ ಜಾಂವ್ಕ್ ನಾಂ ಪುಣ್ ಕಾನುನಿ ದ್ರಷ್ಟೇನ್ ತಾಕಾ ನಷ್ಟ್ ಜಾಲಾ ಮ್ಹಣ್ ತೀರ್ಪ್ ದೀವ್ನ್ ರು. 50,000 ಪರಿಹಾರ್ ದಿವಯ್ಲೊ.
ಕಾಲಿಯಪ್ಪಾ ವಿರೋದ್ ವಾಯಾಪುರಿ- ಹ್ಯಾ ದಾವ್ಯಾಂತ್ ಜರ್ ವಾದಿಕ್ ಪಯ್ಶಾಂ ದ್ವಾರಿಂ ನೀಜ್(Actual injury) ನಷ್ಟ್ ಜಾಲ್ಲ್ಯಾ ವಿಶಿಂ ಸಾಕ್ಷ್ ನಾಂ ತರೀ ತಾಚಾ ಕಾನುನಿ ದ್ರಷ್ಟೇನ್ ಅಸಲ್ಲ್ಯಾ ಹಕ್ಕಾಚೆಂ ಉಲ್ಲಂಘನ್ ಜಾಲಾಂ ತರ್ ತಾಕಾ ಪರಿಹಾರ್ ಮೆಳ್ತಾ.
ಭವಾನಿಂ ವಿರೋದ್ ಅನಂತ್ ಕಾಮ್ತಿ- ಜರ್ ಎಕಾ ವ್ಯಕ್ತಿಚೆಂ ಕಾನುನಿ ದ್ರಷ್ಟೇಂತ್ ಮಾತ್ರ್ ಅನ್ಯಾಯ್ ಜಾಲಾಂ ಅನಿಂ ಪಯ್ಶ್ಯಾನಿಂ ಹೆರ್ ಖಂಯ್ಚ್ಯಾಯ್ ರೀತಿನ್ ನಷ್ಟ್ ಜಾವ್ನಾ ತರ್ ತ್ಯಾ ವ್ಯಕ್ತಿನ್ ಸ್ಪೇಸಿಫಿಕ್ ರೀಲಿಫ್ ಕಾಯ್ದ್ಯಾಚಾ ಕಲಂ ೩೪ಚ್ಯಾ ಮುಳಾಂತ್ ದಾವೊ ದಾಖಲ್ ಕರ್ನ್ ಪರಿಹಾರ್ ಅಪ್ಣಾಂ ವ್ಕ್ ಸಾದ್ಯ್ ಅಸಾ ಮ್ಹಣ್ತಾ.
ಮುನಿಸಿಪಾಲ್ ಬೊರ್ಡ್ ಅಫ್ ಅಗ್ರಾ ವಿರೋದ್ ಅಶ್ರಫಿಲಾಲ್- ಜರ್ ಎಕ್ ವ್ಯಕ್ತಿಚೆ ನಾಂವ್ ಎಲೆಕ್ಷನಾಚ್ಯಾ (Electoral Roll)ಪಟ್ಟೆಂತ್ ಅಸೊಂಕ್ ಜಾಯ್ ಅಸಲ್ಲಿಂ ಸಕ್ಕಡ್ ಲಕ್ಷಣಾಂ ಅಸೊನಿಂ ಜರ್ ನಾಂವ್ ನಾಂ ಅನಿಂ ಹ್ಯಾ ಮುಕಾಂತ್ರ್ ತಾಚೆಂ ಮತ್ (ವೋಟ್/Vote) ಘಾಲ್ಚೆಂ ಹಕ್ಕ್ ಹೊಗ್ಡಾಯ್ಜೆ ಪಡ್ತಾ ತರ್ ತೊ/ತಿ ವ್ಯಕ್ತಿ ಕಾನುನಿ ದ್ರಷ್ಟೇನ್ ನಷ್ಟ್ ಅಪ್ಣಾಯ್ತಾ ಅನಿ ಹ್ಯಾ ಖಾತಿರ್ ಅಧಿಕಾರಿಂ/ಸರ್ಕಾರಾ ವಿರೋದ್ ಕೊಡ್ತಿಕ್ ವಚುನ್ ಪರಿಹಾರ್ ಅಪ್ಣಾವ್ಯೆತ್.
2. ಕಾನುನಿ ಹಕ್ಕಾಚ್ಯಾ ಉಲ್ಲಂಘನಾ ಭಾಯ್ರ್ ಜಾಲ್ಯಾ ಘಡಿತ್/ಚೂಕಿ ದ್ವಾರಿ ಜಾಲ್ಲೊ ನಷ್ಟ್:
ಥೊಡೆ ಪಾವ್ಟಿ ಎಕಾ ವ್ಯಕ್ತಿಚ್ಯಾ ಕಾರ್ಯಾ ದ್ವಾರಿ ಅನ್ಯೇಕಾ ವ್ಯಕ್ತಿಕ್ ನಷ್ಟ್ ಜಾತಾ ಪುಣ್ ಹೊ ನಷ್ಟ್ ಕಾನುನಾ ಮುಳಾಂತ್ ತಾಚ್ಯಾ ಹಕ್ಕಾಚೆ ಉಲ್ಲಂಘನ್ ಜಾಯ್ನಾಸ್ತಾ ಜಾಲೆಂ ತರ್ ತೊ ನಷ್ಟ್ ತ್ಯಾ ವ್ಯಕ್ತಿ ಥಾವ್ನ್ ಅಪ್ಣಾಂವ್ಕ್ ವ ತೆಂ ಕಾರ್ಯೆಂ ಕಾನುನಾ ಮುಳಾಂತ್ ಅನುಚಿತ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ಹಾಂಗಾಸರ್ ಉಡಾಸಾಂತ್ ದವ್ರುಂಕ್ ಜಾಯ್ ಜಾಲ್ಲಿ ಸಂಗತ್ ಮ್ಹಳ್ಯಾರ್ ವ್ಯಕ್ತಿಕ್ ಜಾಲ್ಯಾ ನಷ್ಟಾಚೆರ್ ಹೊಂದೊನ್ ಕೊಡ್ತಿಂತ್ ಪರಿಹಾರ್ ಅಪ್ಣಾಂವ್ಕ್ ಸಾದ್ಯ್ ನಾಂ ಬದ್ಲಾಕ್ ತೊ ನಷ್ಟ್ ಕಾನುನಾಂ ಮುಳಾಂತ್ ತಾಕಾ ಅಸಲ್ಲ್ಯಾ ಹಕ್ಕಾಚ್ಯಾ ಉಲ್ಲಂಘನಾ ದ್ವಾರಿ ಜಾಲಾಗೀ ಮ್ಹಳ್ಳೆಂ ಪಳೆಂವ್ಕ್ ಜಾಯ್.
ಥೊಡೆ ದಾಖ್ಲೆ ದೀಂವ್ಚೆ ತರ್-
ಚಾಸೆಮೊರ್ ವಿರೋದ್ ರಿಚ್ಚರ್ಡ್ಸ್- ಹ್ಯಾ ದಾವ್ಯಾಂತ್ ವಾದಿ ಎಕಾ ಮಿಲ್ಲಾಚೊ ಧನಿ ಅನಿಂ ಸರಿ ಸುಮಾರ್ 60 ವರ್ಸಾಂ ಥಾವ್ನ್ ಝರಿಚೆಂ ಉದಾಕ್ ಯೆಂವ್ಚ್ಯಾ ಕಾಲುವೆ ಥಾವ್ನ್ ಉದಾಕ್ ತಾಚ್ಯಾ ಮಿಲ್ಲಾಕ್ ಉಪಯೋಗ್ ಕರ್ನ್ ಅಸಲ್ಲೊ. ಹಿ ಝರ್ ಪ್ರತಿವಾದಿಚ್ಯಾ ಜಾಗ್ಯಾಚಾ ಧರ್ಣಿ ಮುಳಾಂತ್ ಅಸಲ್ಲಿ. ಪ್ರತಿವಾದಿನ್ ತಾಚ್ಯಾ ಜಾಗ್ಯಾರ್ ಎಕ್ ವ್ಹಡ್ ಬಾಂಯ್ ಖೊಂಡುನ್ ತಾಚೆಂ ಉದಾಕ್ ಕ್ರೊಯ್ಡೊನ್ ಮ್ಹಳ್ಳ್ಯಾ ಶಹರಾಕ್ ಉದಾಕ್ ದೀಂವ್ಕ್ ಅರಂಭ್ ಕೆಲೆಂ. ಹ್ಯಾ ವರ್ವಿಂ ವಾದಿನ್ ಉಪಯೋಗ್ ಕರ್ಚ್ಯಾ ಕಾಲುವೆಂತ್ ಉದಾಕ್ ಉಣೆಂ ಜಾವ್ನ್ ವಾದಿನ್ ತಾಚೆಂ ಮಿಲ್ಲ್ ಬಂದ್ ಕರಿಜಾಯ್ ಪಡ್ಲೆಂ ಅನಿಂ ಮೊಸ್ತ್ ನಷ್ಟ್ ತಾಕಾ ಜಾಲೊ. ಕೊಡ್ತಿ ಮುಕಾರ್ ಹೊ ದಾವೊ ವಾದಿನ್ ಹಾಡಲ್ಲ್ಯಾ ವೆಳಿಂ ವಾದಿನ್ ಪ್ರತಿವಾದಿನ್ ಅನ್ಯಾಯ್ ಕೆಲಾಂ ಮ್ಹಣ್ ಸಾಂಗುಂಕ್ ಜಾಯ್ನಾ ಅನಿಂ ಅದಿಂ ಥಾವ್ನ್ ಉಪಯೋಗ್ ಕರ್ನ್ ಅಯ್ಲಾ ಮ್ಹಳ್ಳೊ ವಾದ್ ಚಲನಾಂ ಕಿತ್ಯಾಕ್ ಹಾಂಗಾಸರ್ ವಾದಿಚೊ ಕಾನುನಾ ಮುಳಾಂತ್ ಅಸಲ್ಲ್ಯಾ ಹಕ್ಕಚೆಂ ಉಲ್ಲಂಘನ್ ಜಾಂವ್ಕ್ ನಾಂ ಮ್ಹಳ್ಳೊ ನಿರ್ಣಯ್ ದಿಲೊ.
ಗ್ಲೊಸೆಸ್ಟರ್‌ಶ್ಯೆರ್ ಗ್ರಾಮರ್ ಸ್ಕೂಲಾಚಿ ಕೇಸ್- ಹ್ಯಾ ದಾವ್ಯಾಂತ್ಲೊ ಪತಿವಾದಿ ಶಿಕ್ಷಕ್ ಜಾವ್ನಾಸೊನ್ ವಾದಿಚ್ಯಾ ಇಸ್ಕೊಲಾ ಲಾಗ್ಸರ್ ಅನ್ಯೇಕ್ ಇಸ್ಕೊಲ್ ಅರ್ಂಭ್ ಕರ್ತಾ (ಹೆಂ ಅದ್ಲ್ಯಾ ಕಾಲಾಚೆಂ ಪುಣ್ ಅತಾಂ ಎಕ್ ಇಸ್ಕೊಲ್ ಅನ್ಯೇಕ್ ಇಸ್ಕೊಲಾ ಥಾವ್ನ್ ಇತ್ಲೆಂಚ್ ಪಯ್ಸ್ ಅಸೊಂಕ್ ಜಾಯ್ ಮ್ಹಳ್ಳೆಂ ನಿಯಮ್ ಅಸಾ). ಹ್ಯಾ ವರ್ವಿಂ ವಾದಿಚ್ಯಾ ಇಸ್ಕೊಲಾಚಿ ಭುರ್ಗಿಂ ಸಕ್ಕಡ್ ಪ್ರತಿವಾದಿಚ್ಯಾ ಇಸ್ಕೊಲಾಕ್ ಸೆರ್ವೊತಾತ್. ವಾದಿ ಕೊಡ್ತಿಕ್ ವಚುನ್ ಪ್ರತಿವಾದಿಚೆಂ ಇಸ್ಕೊಲ್ ಬಂದ್ ಕರಿಜಾಯ್ ಮ್ಹಣ್ ವಿನಂತಿ ಕೆಲ್ಲ್ಯಾಕ್ ಕೊಡ್ತ್ ತಶೆಂ ಕರುಂಕ್ ಜಾಯ್ನಾ ಕಿತ್ಯಾಕ್ ವಾದಿಚೊ ಕಾನುನಾ ಮುಳಾಂತ್ ಅಸ್ಚೊ ಹಕ್ಕ್ ಉಲ್ಲಂಘನ್ ಜಾಯ್ನಾ ಮ್ಹಣ್ತಾ.
ಪಿ. ಸಿತರಾಮಯ್ಯ ವಿರೋದ್ ಮೋಹಲೊಕ್ಷಮ್ಮ- ಹ್ಯಾ ದಾವ್ಯಾಂತ್ 5 ಜಣ್ ಪ್ರತಿವಾದಿಂಚ್ಯಾ ಅನಿಂ ವಾದಿಚ್ಯಾ ಜಾಗ್ಯಾರ್ ಝರಿಚೆಂ ಉದಾಕ್ ವಾಳ್ತಾಲೆಂ. ಪ್ರತಿವಾದಿನಿಂ ತಾಂಚ್ಯಾ ಜಾಗ್ಯಾರ್ ತೆಂ ಉದಾಕ್ ವಾಳೊನ್ ಯೇಂವ್ಕ್ ನಜೊ ಮ್ಹಣೊನ್ ತಾಂಚ್ಯಾ ಜಾಗ್ಯಾಚಾ ಬಗ್ಲೇನ್ ಎಕ್ ಖಣಿ ಕಾಡ್ನ್, ಭದ್ರ್ ಕಂಫ್ಂಡ್ ಬಾಂದ್ಲೆಂ. ಹ್ಯಾ ವರ್ವಿಂ ಸಗ್ಳೆಂ ಪಾವ್ಸಾಚೆಂ ಉದಾಕ್ ವಾದಿಂಚ್ಯಾ ಹಿಂತ್ಲಾಂತ್ ವಾಳೊನ್ ಮಸ್ತ್ ನಷ್ಟ್ ಜಾಲೊ. ವಾದಿನ್ ಕೊಡ್ತಿಕ್ ವಚುನ್ ಪ್ರತಿವಾದಿ ವಿರೋದ್ ದಾವೊ ಘಾಲ್ನ್ ತಾಂಕಾ ಜಾಲ್ಲೊ ನಷ್ಟ್ ದೀಂವ್ಕ್ ಅನಿಂ ತಾಣಿಂ ಘಾಲ್ಲೆಂ ಕಂಫ್ಂಡ್ ಕಾಡ್ನ್ ಪಯ್ಲೆಂ ಅಸಲ್ಲೆ ಬರಿಂ ಕರುಂಕ್ ವಿನಂತಿ ಕೆಲ್ಲೆ ವೆಳಿಂ, ನ್ಹಂಯ್ಚಾ ಬಗ್ಲೆಕ್ ಅಸ್ಚ್ಯಾ ಜಾಗ್ಯಚಾ ಧನ್ಯಾಕ್ ತಾಚ್ಯಾ ಹಿತ್ಲಾಂತ್ ಉದಾಕ್ ವಾಳಾನಾಶೆಂ ಕರುಂಕ್ ಕಂಫ್ಂಡ್ ಭಾಂದ್ಚೆಂ ಹಕ್ಕ್ ಅಸಾ ಅನಿ ಹ್ಯಾ ವರ್ವಿಂ ತಾಚ್ಯಾ ಸೆಜಾರ‍್ಯಾಕ್ ನಷ್ಟ್ ಜಾತಾ ತರೀ ಕೊಡ್ತಿನ್ ತಾಚ್ಯಾ ಹಕ್ಕಾಚೆರ್ ಅಡ್ಕಳ್ ಹಾಡುಂಕ್ ಜಾಯ್ನಾ. ಸಾಂಗಾತಾಚ್ ಹ್ಯಾ ನಷ್ಟಾಕ್ ಕಾನುನಾಂ ಮುಳಾಂತ್ ಪರಿಹಾರ್ ಅಪ್ಣಾಂವ್ಕ್ ಸಾದ್ಯ್ ನಾಂ ಮ್ಹಣ್ತಾ.
ಟೌನ್ ಎರಿಯ ಕಮಿಟಿ ವಿರೋದ್ ಪ್ರಬು ದಯಾಳ್- ಹ್ಯಾ ದಾವ್ಯಾಂತ್ ಪ್ರತಿವಾದಿನ್ 16 ಅಂಗ್ಡಿ ಪರ್ನ್ಯಾ ಬಿಲ್ಡಿಂಗಾಚ್ಯಾ ಜಾಗ್ಯಾರ್ ಉತ್ತರ ಪ್ರದೇಶ್ ಮುನಿಸಿಪಾಲಿಟಿ ಕಾಯ್ದ್ಯಾಚಾ ಕಲಂ 178 ಮುಳಾಂತ್ ಕಾಣ್ಘೆಂವ್ಕ್ ಜಾಯ್ ಅಸಲ್ಲಿ ಪರ್ವಣ್ಗಿ ಘೆನಾಸ್ತಾ ಅನಿಂ ಮುನಿಸಿಪಾಲಿಟಿಕ್ ನೋಟಿಸ್ ದಿನಾಸ್ತಾಂ ಬಾಂದ್ಲಿಂ. ಹ್ಯಾ ಖಾತಿರ್ ಮುನಿಸಿಪಾಲಿಟಿನ್ ತ್ಯೊ ಸಕ್ಕಡ್ ಅಂಗ್ಡಿ ನಾಸ್ ಕೆಲ್ಲ್ಯಾ ವೆಳಿಂ ಪ್ರತಿವಾದಿ ಕೋಡ್ತಿಕ್ ವೆತಾ ಅನಿಂ ತಾಕಾ ಜಾಲ್ಯಾ ನಷ್ಟಾಚೊ ಪರಿಹಾರ್ ವಿಚಾರ್ತಾ. ಕೋಡ್ತ್ ತಾಕಾ ಜಾಲ್ಲೊ ನಷ್ಟ್ ಕಾನುನಾಂ ಮುಳಾಂತ್ ತಾಕಾ ಅಸ್ಚ್ಯಾ ಹಕ್ಕಾಚ್ಯಾ ಉಲ್ಲಂಘನಾ ವರ್ವಿಂ ಜಾಲ್ಲೊ ನಷ್ಟ್ ನ್ಹಯ್ ಮ್ಹಣ್ತಾ.
ದೆಕುನ್ ಎಕಾ ವ್ಯಕ್ತಿಚ್ಯಾ ಕಾರ್ಯಾ ವರ್ವಿಂ ಅನ್ಯೇಕಾ ವ್ಯಕ್ತಿಕ್ ಪಯ್ಶಾನ್ ವ ಹೆರ್ ಖಂಯ್ಚ್ಯಾಯ್ ಭಾಯ್ಲ್ಯಾ ದ್ರಷ್ಟೇನ್ ದಿಸ್ಚೆ ತಸಲೊ ನಷ್ಟ್ ಕರುಂಕ್ ನಾಂ ತರೀ ಜರ್ ಕಾನುನಾಂ ಮುಳಾಂತ್ ತಾಕಾ ಅಸ್ಚ್ಯಾ ಹಕ್ಕಾಚೆಂ ಉಲ್ಲಂಘನ್ ಕೆಲಾಂ ತರ್ ನಷ್ಟ್ ಜಾಲ್ಲ್ಯಾ ವ್ಯಕ್ತಿನ್ ಕೊಡ್ತಿ ಥಾವ್ನ್ ಪರಿಹಾರ್ ಅಪ್ಣಾವ್ಯೆತ್.
