ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರ್ಚಿ:
ಭಾರತಾಂತ್ಲ್ಯಾ ರಾಜ್ಯ್ ಹ್ಯೆಕೋಡ್ತಿಂಕ್ ಮೇಲ್ವಿಚಾರಕ್ ಅನಿಂ ನಿಯಮಾವಳಿಂ ರಚನ್ ಕರ್ಚೊ ಹಕ್ಕ್ ದಿಲಾ ಅನಿಂ ಹ್ಯಾ ಅಧಿಕಾರಾ ಮುಳಾಂತ್ ತಾಂಚಾ ಪರಿಮಿತೆಚಾ ವ್ಯಾಪ್ತಿಂತ್ ಯೆಂವ್ಚಾ ಕ್ರೀಮಿನಲ್ ಕೊಡ್ತಿಂಚೆರ್ ಹಕ್ಕ್ ಚಲಂವ್ಕ್ ಅವ್ಕಾಸ್ ಅಸಾ. ಅಶೆಂ ನೀತ್ ಉಬಾರ್ನ್ ದರ್ಚೆ ಪಾಸತ್ ಉಂಚ್ಲ್ಯಾ ಕೊಡ್ತಿಂಕ್ (ಹ್ಯೆ ಕೊಡ್ತಿಕ್) ಕ್ರೀಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ವಜಾ ಕರ್ಚೊ ಅಧಿಕಾರ್ ದಂಡ ಪ್ರಕ್ರೀಯ (ಕ್ರಿಮಿನಲ್ ಪೋಷಿಜರ್ ಕೋಡ್) ಕಾಯ್ದ್ಯಾಚೆಂ ಕಲಂ 482 ಮುಳಾಂತ್ ಅಸಾ. ಜರ್ ದಾಕಲ್ ಕೆಲ್ಲಿ ಪ್ರಥಮ್ ಮಾಹೆತ್ ವರ್ದಿ ಖಂಯ್ಚೊಯ್ ಎಕ್ ಅಪ್ರಾದ್ ಜಾಲ್ಲೆ ವಿಶಿಂ ಕಾಂಯ್ ಅಭಿಪ್ರಾಯ್ ದಾಕಯ್ನಾ ತರ್ ತ್ಯಾ ಪ್ರಥಮ್ ಮಾಹೆತಿಚೆರ್ ಹೊಂದೊನ್ ತನ್ಕಿ ಅರಂಭ್ ಕರ್ಚ್ಯಾ ಪಯ್ಲೆಂ ಉಂಚ್ಲ್ಯಾ ಕೊಡ್ತಿ ಮುಕಾಂತ್ರ್ ತಿ ಪ್ರಥಮ್ ಮಾಹೆತ್ ವರ್ದಿ ವಜಾ ಕರ್ಯೆತಾ. ಸಕ್ಟಾಂಕ್ ಎಕಚ್ ಮಾಪಾನ್ ನೀತ್ ದೀಂವ್ಚ್ಯಾಕ್ ಅನಿಂ ಎಕಾ ವ್ಯಕ್ತಿಕ್ ತಾಚೆ ವಿರೋದ್ ಫಟ್ ಫಿರ‍್ಯಾದ್ ಮಾಂಡುನ್ ಗರ್ಜೆವಿಣೆಂ ತಾಕಾ ಕಷ್ಟಾಂಕ್ ಒಳಗ್ ಕರ್ಚೆ ರಾವಂವ್ಚೆ ಪಾಸತ್ ಹೊ ಅವ್ಕಾಸ್ ಕೊಡ್ತಿನ್ ದಿಲಾ.
ಉಂಚ್ಲ್ಯಾ ಕೊಡ್ತಿನ್ ಹ್ಯಾ ಸಕಯ್ಲ್ ದಿಲ್ಲ್ಯಾ ಪ್ರೋವಿಜನಾ ಪ್ರಕಾರ್ ದಾವೊ ಸ್ವೀಕಾರ್ ಕರ‍್ಯೇತಾ-
- ದಂಡ ಪ್ರಕ್ರೀಯ ಕಾಯ್ದ್ಯಾಚ್ಯಾ ಕಲಂ 482 ಮುಳಾಂತ್ ಅರ್ಜಿ ದಾಕಲ್ ಕರ್ಚಿ.
- ಭಾರತಿಯ ಸಂವಿಂಧಾನಾಚ್ಯಾ ಪರಿಛ್ಛೇದ್ 226 ಮುಳಾಂತ್ ರಿಟ್ ಅರ್ಜೆ (Writ of Mandamus)ದ್ವಾರಿ ಉಂಚ್ಲ್ಯಾ ಕೋಡ್ತಿ ಥಾವ್ನ್ ಪರಿಹಾರ್ ಅಪ್ಣಾಂವ್ಚೊ.
- ಕ್ರೀಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದೆಚೆರ್ ಹೊಂದೊನ್ ಜರ್ ಎಕಾ ವ್ಯಕ್ತಿಕ್ ಅರೋಪಿ ಕರ್ನ್, ಅರೆಷ್ಟ್ ಕೆಲಾ ತರ್ ತಾಕಾ ರಿಟ್ ಅರ್ಜೆ ಮುಕಾಂತ್ರ್ ಸುಟ್ಕಾ ದಿವ್ಯೆತ್(Writ of Habeas Corpus)
ಎಕ್ ಕ್ರೀಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ಕೊಣಾ ವಿರೊದ್ ದಾಕಲ್ ಕೆಲಾಗೀ ತ್ಯಾ ವ್ಯಕ್ತಿ ವಿಶ್ಯಾಂತ್ ಜರ್ ತಿ ಥೊಡೊ ಪುಣಿ ಅರೋಪ್ ಅಸಾ ಮ್ಹಳ್ಳೊ ದುಬಾವ್ ವ್ಯಕ್ತ್ ಕರ್ತಾ ತರ್ ಅನಿ ತ್ಯಾ ಪ್ರಥಮ್ ಮಾಹೆತಿಚೆರ್ ಹೊಂದೊನ್ ಎಕ್ ಪೋಲಿಸ್ ಅಧಿಕಾರಿ ತಾಚಿ ತನ್ಕಿ ಅರಂಭ್ ಕರ್ತಾ ತರ್ ಸಾದಾರಣ್ ಜಾವ್ನ್ ಉಂಚ್ಲಿ ಕೊಡ್ತ್ ತಸಲೆಂ ಕ್ರೀಮಿನಲ್ ಕಂಪ್ಲೇಂಟ್/ ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರುಂಕ್ ಪಾಟಿ ಸರ್ತಾ. ಸೊಂಪ್ಯಾ ಉತ್ರಾನಿಂ ಸಾಂಗ್ಚೆಂ ತರ್ ಎಕ್ ಪೋಲಿಸ್ ಅಧಿಕಾರಿ ದಾಖಲ್ ಕೆಲ್ಲ್ಯಾ ಪ್ರಥಮ್ ಮಾಹೆತೆಚೆರ್ ಹೊಂದೊನ್ ಅಪ್ಲಿ ತನ್ಕಿ ಅರಂಭ್ ಕರ್ತಾ ತರ್ ತೆಂ ಕ್ರೀಮಿನಲ್ ಕಂಪ್ಲೇಂಟ್/ ಪ್ರಥಮ್ ಮಾಹೆತ್ ವರ್ದಿ ಸಾಮಾನ್ಯ್ ಜಾವ್ನ್ ರದ್ದ್ ಕರಿನಾ.
ಹ್ಯೇಕೊಡ್ತಿನ್ ತಾಕಾ ಅಸಲ್ಲೊ ಅಧಿಕಾರ್ ಸಕ್ಯೆಲ್ ದಿಲ್ಲ್ಯಾ ನಿಯಮಾವಳಿಂ ಪ್ರಕಾರ್ ಜ್ಯಾರಿ ಕರಿಜೆ ಮ್ಹಣ್ ಸುಪ್ರಿಂ ಕೋಡ್ತ್ ಹರ್ಯಾಣ್ ರಾಜ್ಯಾ ವಿರೋದ್ ಭಜನ್ ಲಾಲ್ ಮ್ಹಳ್ಳ್ಯಾ ಕೇಜಿಂತ್ ನಿರ್ದೇಶನ್ ದಿತಾ:
- ಎಕ್ ಕ್ರೀಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ಸಂಪೂರ್ಣ್ ರೀತಿನ್ ಕಾಣ್ಘೇವ್ನ್, ಭಾಯ್ಲ್ಯಾ ದ್ರಷ್ಟೇನ್ ಪಳೆತಾನಾ ಜರ್ ಅರೋಪಿ ಮ್ಹಣ್ ದಾಕಯಿಲ್ಲ್ಯಾ ವ್ಯಕ್ತಿ ಥಾವ್ನ್ ತಸಲೊ ಅರೋಪ್ ಜಾಂವ್ಕ್ ನಾಂ ಮ್ಹಳ್ಳೊ ದುಬಾವ್ ಉದೆತಾ ತರ್ ತೆಂ ಕ್ರೀಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರ‍್ಯೇತಾ.
- ಜರ್ ಎಕಾ ಕಂಪ್ಲೇಂಟಾಂತ್/ಪ್ರಥಮ್ ಮಾಹೆತ್ ವರ್ದೆಂತ್ ದಿಲ್ಲೆ ಅರೋಪ್ ಅರೋಪಿ ಥಾವ್ನ್ ಜಾಂವ್ಕ್ ಸಾಧ್ಯ್ ನಾಂ ಅಸ್ಚೊ ತಸಲೊ ಅನಿಂ ತ್ಯಾ ವ್ಯಕ್ತಿನ್ ಕೆಲಾ ಮ್ಹಳ್ಳೊ ಅರೋಪ್ ಅದಾರಾ ರಹಿತ್ ತರ್ ತೆಂ ಕ್ರಿಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರ್ಯೆತ್.
- ಜರ್ ಕಂಪ್ಲೇಂಟಾಂತ್/ಪ್ರಥಮ್ ಮಾಹೆತ್ ವರ್ದೆಂತ್ ಕೆಲ್ಲೊ ಅರೋಪ್ ಅನಿಂ ತಾಕಾ ಸಹಾಯ್ ಜಾವ್ನ್ ಒಟ್ಟು ಕೆಲ್ಲ್ಯೊ ಸಾಕ್ಷಿಂಕ್ ಎಕಾಮೆಕಾ ತಾಳ್ ಪಡಾನಾ ತರ್ ಅನಿಂ ಕೆಲ್ಲ್ಯಾ ಅರೋಪಾವಿಶಿಂ ಸಾರ್ಕೊ ವಿವರ್ ದಿನಾಂ ತರ್ ತೆಂ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರ್ಯೆತ್.
- ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕೆಲ್ಲ್ಯಾ ವ್ಯಕ್ತಿನ್ ಅರೋಪ್ ಕೆಲ್ಲ್ಯಾ ವ್ಯಕ್ತಿಕ್ ನಷ್ಟಾಕ್ ಒಳಗ್ ಕರ್ಚ್ಯಾ ಉದ್ದೇಶಾನ್ ತೆಂ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕೆಲಾ ಅನಿಂ ಅಪ್ಲೊ ವಯಕ್ತಿಕ್ ದ್ವೇಷ್ ದಾಕಂವ್ಕ್ ಕೆಲಾ ಮ್ಹಳ್ಳೊ ಅಭಿಪ್ರಾಯ್ ಯೆತಾ ತರ್ ತಸಲೆಂ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರ್ಯೆತ್.
- ಜರ್ ಎಕ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರ್ನ್ ತನ್ಕಿ ಅರಂಭ್ ಕರುಂಕ್ ಅನಿಂ ಮುಂದರುನ್ ವ್ಹರುಂಕ್ ದಂಡ ಪ್ರಕ್ರೀಯ ಕಾಯ್ದ್ಯಾ ವಾ ಹೆರ್ ಖಂಯ್ಚಾಯ್ ಕಾಯ್ದ್ಯಾ ಮುಳಾಂತ್ ಅಡ್ಕಳ್ ಅಸಾ ತರ್ ತೆಂ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರ್ಯೆತ್.
ಸಾದಾರಣ್ ಜಾವ್ನ್ ಹ್ಯೇಕೊಡ್ತ್ ಎಕ್ ಕ್ರಿಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ಸುಲಭಾಯೆನ್ ರದ್ದ್ ಕರಿನಾ. ಜರ್ ಎಕ್ ವ್ಯಕ್ತಿ ಅನ್ಯೇಕಾ ವ್ಯಕ್ತಿಕ್ ಅನ್ಯಾಯಾಕ್ ಒಳಗ್ ಕರ್ಚ್ಯಾ ಉದ್ದೇಶಾನ್ ಕರ್ತಾ ತರ್ ತಸಲ್ಯಾ ವೇಳಾರ್ ಹ್ಯೇಕೊಡ್ತ್ ಮಧೆಂ ಪ್ರವೇಶ್ ಕರ್ನ್ ರದ್ದ್ ಕರ್ತಾ. ಎಕ್ ಕ್ರಿಮಿನಲ್ ಕಂಪ್ಲೇಂಟ್/ಪ್ರಥಮ್ ಮಾಹೆತ್ ವರ್ದಿ ನೀಜ್ ಜಾವ್ನ್ ಜಾಲ್ಲ್ಯಾ/ಕೆಲ್ಲ್ಯಾ ವಿಶಿಂ ದಾಖಲ್ ಜಾಲಾಗೀ ವಾ ಅನ್ಯೇಕಾ ವ್ಯಕ್ತಿಕ್ ಸಂಕಷ್ಟಾಕ್ ಒಳಗ್ ಕರ್ಚ್ಯಾ ಪಾಸತ್ ದಾಖಲ್ ಕೆಲಾಗೀ ಮ್ಹಳ್ಳೆಂ ಹರೇಕಾ ಕೇಜಿಚೆರ್ ಹೊಂದೊನ್ ಕೋಡ್ತ್ ನಿರ್ಧಾರ್ ಕರ್ತಾ.
