ಮಾ. ಬಾಪ್. ಅಸ್ಸಿಸಿ ಅಲ್ಮೇಡಾ
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
ಪ್ರಸ್ತಾವನ್:
ಎಕಾ ಅರೋಪಿಕ್ ಕಾನುನಾಖಾಲ್ ಶಿಕ್ಷಾ ದೀಂವ್ಚ್ಯಾಕ್, ತಾಣೆ ಕೆಲ್ಲ್ಯಾ ಅರೋಪಾವಿಶಿಂ ತಾಚೆ ವಿರೋಧ್ ಪೋಲಿಸಾಂಕ್ ದೀಂವ್ಚಿ ಪಯಿಲ್ಲಿ ಮಾಹೆತ್. ಹ್ಯಾ ಮಾಹೆತಿಚೆರ್ ಹೊಂದ್ವೊನ್ ಪೋಲಿಸ್ ತಾಂಚಿ ತನ್ಕಿ ಅರಂಭ್ ಕರ್ತಾತ್ ಅನಿ ಅರೋಪಿ ವಿರೋದ್ ತಾಣಿಂ ಅಪ್ಣಾಯಿಲ್ಲಿ ಸಗ್ಳಿ ಮಾಹೆತ್ ಸಾಂಗಾತಾ ಘಾಲ್ನ್ ಕೊಡ್ತಿಂತ್ ಅರೋಪ್ ಪಟ್ಟಿ ದಾಖಲ್ ಕರ್ನ್ ತ್ಯಾ ಅರೋಪಿಕ್ ಕಾನುನಾಖಾಲ್ ಶಿಕ್ಷ್ಯಾ ಲಾಬಂವ್ಕ್ ಅದಾರ್ ದಿತಾತ್. ಹಿ ಮಾಹೆತ್ ಪ್ರಮುಖ್ ಅನಿ ಹ್ಯಾ ಮಾಹೆತಿಚೆರ್ ಅದಾರುನ್ ಅರೋಪಿಕ್ ತಾಣೆ ಕೆಲ್ಲ್ಯಾ ಚುಕಿಕ್ ಶಿಕ್ಷ್ಯಾ ಲಾಬೊಂಕ್ ಸಾದ್ಯ್. ಹಿ ಮಾಹೆತ್ ತಾಚೆಸ್ತಕಿ ಸಂಪೂರ್ಣ್ ಅನಿ ಮೊಲಾಧಿಕ್ ನ್ಹಯ್ ತರಿ, ಎಕ್ ಅಪ್ರಾದ್ ಜಾಲ್ಲ್ಯಾ ಘಡ್ಯೆ ದಿಲ್ಲಿ ಪ್ರಪ್ರಥಮ್ ಮಾಹೆತ್ ಜಾಲ್ಲೆ ವರ್ವಿಂ ಎಕ್ ಪ್ರಮುಖ್ ಸಾಕ್ಷ್ ಜಾಂವ್ಕ್ ಪಾವ್ತಾ. ಸಗ್ಳೊ ದಾವೊ/ಕೇಜ್ ಹ್ಯಾ ಪ್ರಥಮ್ ವರ್ದೆಚೆರ್ ಅದಾರಲ್ಲೆ ವರ್ವಿಂ ಹಿ ಮಾಹೆತ್ ಸಾರ್ಕಿ ದೀಂವ್ಚಿ ಬಹು ಗರ್ಜೆಚಿ. ಕಿತೆಂ ಸಕ್ಕಡ್ ಅಟಾಪುಂಕ್ ಸಾದ್ಯ್ ಅಸಾ ತೆಂ ಸಕ್ಕಡ್ ಹ್ಯಾ ವರ್ದೆಂತ್ ಘಾಲುಂಕ್ ಉಡಾಸ್ ದವ್ರುಂಕ್ ಜಾಯ್.
ಪ್ರಥಮ್ ವರ್ದಿ:
ದಂಡಾ ಪ್ರಕ್ರಿಯಾ ಸಂಹಿತೆ (Criminal Procedure Code) 1973 oತ್ ಪ್ರಥಮ್ ಮಾಹೆತಿಚ್ಯಾ ವರ್ದೆ ವಿಶಿಂ ಪ್ರತ್ಯಕ್ಷ್ ವಿವರ್ ಅಮ್ಕಾಂ ಮೆಳಾನಾಂ ತರೀ, ಕಲಂ (Section) 154(1) oತ್ ದಿಲ್ಲ್ಯಾ ವಾಕ್ಯಾನಿಂ ಅಮ್ಕಾ ಹ್ಯಾ ವಿಶಿಂ ವಿವರ್ ಮೆಳ್ತಾ. ಕಲಂ (Section) 154(1)- “ ಖಂಯ್ಚ್ಯಾಯ್ ಜಾಲ್ಲ್ಯಾ/ಕೆಲ್ಲ್ಯಾ ಅಪ್ರಾದಾವಿಶಿಂ ಮಾಹೆತ್ ಉತ್ರಾಂ ರುಪಿಂ ಪೋಲಿಸಾಂಕ್ ದಿಲ್ಲೆ ವೆಳಿಂ ತ್ಯಾ ಪೋಲಿಸ್ ಅಧಿಕಾರಿನ್ ತಾಣೆಂಚ್ ವ ತಾಚ್ಯಾ ನಿರ್ಧೆಶನಾಖಾಲ್ ಅನ್ಯೇಕ್ಲ್ಯಾನ್ ಬರ್ಪಿಂನಿಶಿಂ ಕಾಣ್ಘೆವ್ನ್, ಮಾಹೆತ್ ದೀಂವ್ಕ್ ಅಯಿಲ್ಲ್ಯಾ ವ್ಯಕ್ತಿಕ್ ವಾಚುನ್ ಸಾಂಗುನ್, ತ್ಯಾ ಮಾಹೆತಿಕ್ ತಾಚಿ ದಸ್ಕತ್ ಕಾಣ್ಘೇವ್ನ್, ತಿ ಮಾಹೆತ್ ಪೋಲಿಸ್ ಠಾಣ್ಯಾಂತ್ ದವರಲ್ಲ್ಯಾ ದಾಖ್ಲ್ಯಾ (ರೆಕೊರ್ಡ್) ಬುಕಾಂತ್ ದಾಖಲ್ ಕರುಂಕ್ ಜಾಯ್.”
ಮೊಟ್ವ್ಯಾನ್ ಸಾಂಗ್ಚೆಂ ತರ್, ಹಿ ವರ್ದಿ ವಾ ಮಾಹೆತ್, ಜಾಲ್ಲ್ಯಾ ಅಪ್ರಾದಾವಿಶಿಂ ಪೋಲಿಸಾಂಕ್ ಅಪ್ರಾದ್ ಕೆಲ್ಲ್ಯಾ ವಿರೋದ್ ಬರ್ಪಿನಿಶಿಂ ದಿಂವ್ಚಿ ಮಾಹೆತ್ ವಾ ಅರೋಪಾಚಿ ವರ್ದಿ. ಹಿ ವರ್ದಿ ಅದಾರುನ್ ಪೋಲಿಸಾನಿ ತ್ಯಾ ಅರೋಪಿ ವಿರೋದ್ ಕಾನುನ್ ಕ್ರಮ್ ಘೆಂವ್ಚೊ ಹ್ಯಾ ವರ್ದೆಚೊ/ಮಾಹೆತಿಚೊ ಉದ್ದೇಶ್. ಎಕಾ ವ್ಯಕ್ತಿನ್ ಪ್ರಥಮ್ ಮಾಹೆತ್ ವರ್ದಿ ದಿಜಾಯ್ ತರ್ ದೋನ್ ನಿಯಮಾ ಪಾಲನ್ ಕರುಂಕ್ ಅಸಾತ್. ತಿಂ-
- ಹಿ ಪ್ರಥಮ್ ಮಾಹೆತ್ ಜಾಂವ್ಕ್ ಜಾಯ್.
- ಹಿ ಮಾಹೆತ್ ಪಯ್ಲ್ಯಾ ದ್ರಷ್ಟೇನ್ ಪಳೆತಾನಾಂಚ್ ಅಪ್ರಾದ್ ಜಾಲ್ಲ್ಯಾವಿಶಿಂ/ಕೆಲ್ಲ್ಯಾವಿಶಿಂ ದಿಸೊನ್ ಯೆಂವ್ಕ್ ಜಾಯ್.
ದಂಡ ಪ್ರಕ್ರಿಯ ಸಂಹಿತೆಚ್ಯಾ ಕಲಂ (Section) 154(1) ಪ್ರಕಾರ್ ಪ್ರಥಮ್ ವರ್ದಿ ದಾಖಲ್ ಕರಿಜೆ ಜಾಲ್ಯಾರ್ ಹೆ ಅಂಶ್ ಅಸೊಂಕ್ ಜಾಯ್-
- ತಿ ಮಾಹೆತ್ ಅಪ್ರಾದ್ ಜಾಲ್ಲ್ಯಾ/ಕೆಲ್ಲ್ಯಾ ವಿಶಿಂ ಅಸೊಂಕ್ ಜಾಯ್.
- ಹಿ ಮಾಹೆತ್ ಪೋಲಿಸ್ ಠಾಣ್ಯಾಂತ್ ತ್ಯಾ ವೆಳಿಂ ಉಸ್ತುವಾರಿ ಪಳೆಂವ್ಚ್ಯಾ ವ್ಯಕ್ತಿಕ್ ದೀಂವ್ಕ್ ಜಾಯ್.
- ಹಿ ಮಾಹೆತ್ ಬರ್ಪಿನಿಶಿಂ ಅಸೊನ್, ಮಾಹೆತ್ ದಿಲ್ಲ್ಯಾ ವ್ಯಕ್ತಿಚಿ ದಸ್ಕತ್ ಅಸೊಂಕ್ ಜಾಯ್.
- ಹಿ ಮಾಹೆತ್ ದಿತೆಲ್ಯಾ ವ್ಯಕ್ತಿನ್ ಉತ್ರಾನ್ ಸಾಂಗ್ಲ್ಯಾರ್ ಠಾಣ್ಯಾಚಾ ಪೋಲಿಸ್ ಅಧಿಕಾರಿನ್ ತಿ ಬರ್ಪಿನಿಶಿ ಮಾಹೆತ್‌ದಾರಾನ್ ಸಾಂಗಲ್ಲೆ ಪರ್ಮಾಣೆಂ ಬರಂವ್ಕ್ ಜಾಯ್ ಅನಿ ಉಪ್ರಾಂತ್ ಮಾಹೆತ್ ದಿಲ್ಲ್ಯಾಕ್ ವಾಚುನ್ ಸಾಂಗುನ್ ತಾಚಿ ದಸ್ಕತ್ ಘೆಂವ್ಕ್ ಜಾಯ್.
- ಉಪ್ರಾಂತ್ ದಿಲ್ಲಿ ಮಾಹೆತ್ ಸ್ಟೇಶನಾಂತ್ ದವರಲ್ಲ್ಯಾ ಸ್ಟೇಶನ್ ಡ್ಯೆರಿಂತ್ ವ ಸ್ಟೇಶನ್ ಹ್‌ಸ್ ಡ್ಯೆರಿಂತ್ ದಾಖಲ್ ಕರುಂಕ್ ಜಾಯ್.
ಹ್ಯಾ ವರ್ದೆಚೊ ಉದ್ದೇಶ್;
- ಜಿಲ್ಲ್ಯಾಚೆ ಮುಖೆಲಿ ಜಾವ್ನಾಸ್ಚೆ ಜಿಲ್ಲ್ಯಾ ದಂಡಾಧಿಕಾರಿ ಅನಿ ಪೋಲಿಸ್ ಅಧಿಕಾರಿಚ್ಯಾ ಗಮಾನಾಕ್ ಜಿಲ್ಲ್ಯಾಂತ್ ಕಾನುನ್ ಸುವ್ಯವಸ್ಥೆ ವಿರೋದ್ ಕಾಮ್ ಕರ್ತೆಲ್ಯಾಂ ವಿರೋದ್ ವಿವರ್ ದಿಂವ್ಚ್ಯಾಕ್.
- ಖಂಯ್ಚ್ಯಾ ನೀತಿಕರ್ತಾ ಹುಜಿರ್ ತ್ಯಾ ಅರೋಪಿಕ್ ಹಾಜರ್ ಕರ್ನ್ ತಾಚೆ ವಿರೋಧ್ ತನ್ಕಿ ಕರ್ತಾತ್‌ಗೀ ತ್ಯಾ ನಿತಿಕರ್ತಾಕ್ ಜಾಲ್ಲ್ಯಾ ಘಡಿತಾಚೊ ವಿವರ್ ಅನಿ ಪೋಲಿಸಾನಿಂ ತನ್ಕಿ ಖಂಯ್ಚ್ಯಾ ಸಂಗ್ತಿಂಚೆರ್ ಅದಾರುನ್ ಅನಿ ಕಸಲ್ಯಾ ವಸ್ತು ಸ್ಥಿತಿಚೆರ್ ಹೊಂದೊನ್ ಅರಂಭ್ ಕೆಲ್ಲಿ ಮ್ಹಳ್ಳ್ಯಾವಿಶಿಂ ಮಾಹೆತ್ ದಿಂವ್ಚ್ಯಾಕ್.
- ಅರೋಪಿ ವಿರೋಧ್ ಕೆಲ್ಲ್ಯಾ ಅರೊಪಾವಿಶಿಂ ನಾತಲ್ಲ್ಯೊ ಸಂಗ್ತಿ ಉಪ್ರಾಂತ್ ಕುಡ್ಸುನ್ ಅರೊಪಿಕ್ ಚಡಿತ್ ಅನ್ಯಾಯ್ ಜಾಯ್ನಾತಲ್ಲೆ ಬರಿ ಪಳೆಂವ್ಕ್.
- ಅರೊಪ್ಯಾ ವಿರೋದ್ ಅರೊಪ್ ಪಟ್ಟಿ ತಯಾರ್ ಕರ್ನ್, ಕಾನುನಾ ಖಾಲ್ ಅಪ್ರಾದ್ಯಾಕ್ ಶಿಕ್ಷ್ಯಾ ದಿವಂವ್ಚ್ಯಾ ದಿಶೆನ್ ಕಾನುನ್ ಕ್ರಮ್ ಅರಂಭ್ ಕರುಂಕ್.
- ಹಿ ಮಾಹೆತಿ ಅದಾರುನ್ ಅಪ್ರಾದ್ ಕೆಲ್ಲ್ಯಾ ವ್ಯಕ್ತಿಕ್ ಸೊಧುನ್ ಕಾಡ್ನ್, ಕಾನುನಾ ಮುಳಾಂತ್ ತಾಕಾ ಶಿಕ್ಷ್ಯಾ ದಿಂವ್ಚೆ ದಿಶಿಂ ಮೆಟಾಂ ಕಾಡುಂಕ್.
- ವರ್ದಿ ದಿಲ್ಲ್ಯಾ ವ್ಯಕ್ತಿಕ್ ತ್ಯಾ ಘಡಿತಾ ವಿಶಿಂ ಉಡಾಸ್ ವೆಚ್ಯಾ ಪಯ್ಲೆಂ ತ್ಯಾ ವ್ಯಕ್ತಿ ಥಾವ್ನ್ ಪ್ರಪ್ರಥಮ್ ಮಾಹೆತ್ ಅಪ್ಣಾಂವ್ಕ್.
ಪ್ರಥಮ್ ವರ್ದೆಂತ್ ಕಸಲೆ ಅಂಶ್ ಅಸೊಂಕ್ ಜಾಯ್:
ಸಾದರ್ಣ್ ಜಾವ್ನ್ ಎಕಾ ಪ್ರಥಮ್ ವರ್ದೆಂತ್ ಅಸಲ್ಯೊ ಸಂಗ್ತಿ ಅಸೊಂಕ್ ಜಾಯ್-
- ಮಾಹೆತ್ ದಿಂವ್ಚೊ ವ್ಯಕ್ತಿ ತೆಂ ಘಡಿತ್ ದೊಳ್ಯಾನಿಂ ಪಳೆಲ್ಲೊ ವ್ಯಕ್ತಿಗೀ ವ ಹೆರಾಂ ಥಾವ್ನ್ ತ್ಯಾ ಘಡಿತಾ ವಿಶಿಂ ಅಯ್ಕಾಲ್ಲೊ ವ್ಯಕ್ತಿಗೀ ಮ್ಹಳ್ಳೆ ಕಳೊಂವ್ಕ್‌ಜಾಯ್,
- ಘಡಿತಾಚೊ ಸ್ವಭಾವ್ ಕಸಲೊ ಮ್ಹಳ್ಳೊ ವಿವರ್,
- ಅರೋಪಿ ಜಾಣಾ ಅಸ್ಚೊ ವ್ಯಕ್ತಿ ತರ್ ತಾಚೆಂ ನಾಂವ್ ಅನಿ ಹೆರ್ ತಾಚಿಂ ಲಕ್ಷಣಾಂ. ಅರೋಪಿಕ್ ಪಳೆಲಾ ತರ್ ತ್ಯಾ ವ್ಯಕ್ತಿಚ್ಯಾ ಸ್ವರೂಪಾಚೊ ವಿವರ್ (ತಾಚ್ಯಾ ಕಾತಿಚೊ ಬಣ್ಣ್, ತಾಚಿ ಉಬಾರಾಯ್, ಸಾದಾರಾಣ್ ಪ್ರಾಯ್, ಥೊಡಿಂ ದಿಸೊನ್ ಅಯಿಲ್ಲಿಂ ತಾಚಿ ಲಕ್ಷಣಾಂ, ನೆಸಲ್ಲೆಂ ವಸ್ತುರ್, ತಾಚ್ಯಾ ತೊಂಡಾರ್ ವಾ ಜಿವಾಚೆರ್ ಪಳೆಲ್ಲಿಂ ಥೊಡಿಂ ಖತಾಂ ವ ಹೆರ್ ಖಂಯ್ಚೆಯ್ ಜಿನೊಸ್ ಇತ್ಯಾದಿ)
- ಹಲ್ಲ್ಯಾಕ್ ವಾ ನಷ್ಟಾಕ್ ಒಳಗ್ ಜಾಲ್ಲ್ಯಾ ವ್ಯಕ್ತಿಚೆಂ ನಾಂವ್ ಅನಿ ವಿವರ್.
- ಘಡಿತ್/ಅಪ್ರಾದ್ ಜಾಲ್ಲೊ ವೇಳ್ ಅನಿ ತಾರೀಕ್.
- ಘಡಿತ್/ಅಪ್ರಾದ್ ಜಾಲ್ಲ್ಯಾ ಜಾಗ್ಯಾಚೊ ವಿವರ್.
- ಘಡಿತ್/ಅಪ್ರಾದ್ ಘಡೊಂಕ್ ಕಾರಾಣ್ ವಾ ಹಲ್ಲೊ ಕೆಲ್ಲೊ ಉದ್ದೇಶ್.
- ಅಪ್ರಾದ್/ಘಡಿತ್ ಜಾಲ್ಲಿ ರೀತಿಚೊ ವಿವರ್ (ಕಶೆಂ ಜಾಲೆಂ, ಹರೇಕಾ ಅರೋಪಿಂಚೊ ಪಾತ್ರ್, ಉಪಯೋಗ್ ಕೆಲ್ಲಿಂ ಹಾತೆರಾಂ ಇತ್ಯಾದಿ)
- ಘಡಿತಾಕ್ ಅಸಲ್ಲ್ಯೊ ಸಾಕ್ಶಿ ಅನಿ ತಾಂಚಿ ನಾಂವಾ, ವಿಳಾಸ್ ಅನಿ ವಿವರ್.
- ಘಡಿತಾಚ್ಯಾ ಜಾಗ್ಯಾ ಥಾವ್ನ್ ಅರೋಪಿನ್ ವರ್ನ್ ಘೆಲ್ಲ್ಯೊ ವಸ್ತು. ಕಸಲ್ಲ್ಯೊಯ್ ವಸ್ತು ನಾಸ್ ಕೆಲ್ಯಾತ್ ತರ್ ತಾಚಿ ಪಟ್ಟಿ ಅನಿ ವಿವರ್.
- ಕಿತೆಂಯ್ ಸಂಭಾಷಣ್ ಜಾಲಾ ತರ್ ತಾಚೊ ವಿವರ್
- ಅರೋಪಿ ಕಿತೆಂಯ್ ಸೊಡ್ನ್ ಗೆಲಾ ತರ್ ತ್ಯಾ ವಸ್ತುಂಚೊ ವಿವರ್ ಅನಿ ಪಟ್ಟಿ. ದಾಖ್ಲ್ಯಾಕ್ ತಾಚೆ ಹಾತಾಂಚಿ ಅಚ್ಚಿ, ವ್ಹಾಣೊ, ವಸ್ತುರ್, ವಾ ಹೆರ್ ಕಿತೆಂಯ್ ವಸ್ತು.
ಎಕಾ ಘಡಿತಾಕ್ ಎಕಚ್ಚ್ ಪಥಮ್ ವರ್ದಿ ದೀಂವ್ಕ್ ಸಾದ್ಯ್ ಅಸಾ ದೆಕುನ್ ಪ್ರಥಮ್ ವರ್ದೆಂತ್ ಕಿತ್ಲೊ ಚಡಿತ್ ವಿವರ್ ದಿತಾತ್ ತಿತ್ಲಿ ಚಡ್ ಕೇಜ್ ಬಳಾಧಿಕ್ ಜಾತಾ. ಪ್ರಥಮ್ ವರ್ದಿ ವಾರ‍್ಯಾರ್ ಅಯ್ಕಾಲ್ಯಾ ಸಂಗ್ತಿ ವಿಶ್ಯಾಂತ್ ದಾಖಲ್ ಕರುಂಕ್ ಜಾಯ್ನಾ. ಪ್ರಥಮ್ ವರ್ದೆಂತ್ ದೀಂವ್ಕ್ ಕಿತೆಂಯ್ ಚುಕೊನ್ ಗೆಲಾ ಅನಿ ತಿ ಮಾಹೆತ್ ಅತೀ ಗರ್ಜೆಚಿ ತರ್ ಅನ್ಯೇಕ್ ಪ್ರಥಮ್ ವರ್ದಿ ದೀಂವ್ಕ್ ಜಾಯ್ನಾ ಪುಣ್ ತ್ಯಾ ವ್ಯಕ್ತಿಕ್ ದಾವ್ಯಾ ವೇಳಾರ್ ಸಾಕ್ಷಿ ಜಾವ್ನ್ ಕರ್ಯೆತ್.
ಟೆಲಿಫೊನಾರ್ ಪೋಲಿಸಾಕ್ ದಿಲ್ಲಿ ಮಾಹೆತ್ ಕೆದಾಳಾ ತಿ ಪ್ರಥಮ್ ವರ್ದಿ ಜಾಂವ್ಕ್ ಪಾವ್ತಾ:
ಜರ್ ಎಕ್ ವ್ಯಕ್ತಿ ಎಕಾ ಘಡಿತಾ ವಿಶಿಂ ಪೋಲಿಸ್ ಠಾಣ್ಯಾಕ್ ಫೋನ್ ಕರ್ನ್ ತಾಚೆಂ ನಾಂವ್ ಅನಿ ವಿವರ್ ದೀವ್ನ್, ಘಡಿತಾಚೊ ವಿವರ್ ದೀವ್ನ್ ತೆಂ ಘಡಿತ್ ಎಕ್ ಅಪ್ರಾದ್ ಜಾಂವ್ಕ್ ಜಾಯ್ ಪಡ್ಚಿಂ ಲಕ್ಷಣಾ ಅಸ್ಚೆಬರಿಂ ವಿವರ್ ದಿತಾ ಅನಿ ಪೋಲಿಸ್ ಅಧಿಕಾರಿ ತೊ ವಿವರ್ ಬರವ್ನ್ ಕಾಣ್ಗೇತಾ ತರ್ ತಿ ಪ್ರಥಮ್ ವರ್ದಿ ಜಾಂವ್ಕ್ ಪಾವ್ತಾ. ಹ್ಯಾ ವರ್ದೆಕ್ ತೊಚ್ಚ್ ಅಧಿಕಾರಿ ಅಪ್ಲಿ ದಸ್ಕತ್ ಘಾಲ್ತಾ. ಹಾಂಗಾಸರ್ ಎಕ್ ಗಮನಾಂತ್ ದವರ್ಚೊ ವಿಶಯ್, ಹರೇಕ್ ಘಡಿತಾಚೆರ್ ಹೊಂದೊನ್ ತಿ ಪ್ರಥಮ್ ವರ್ದಿ ಜಾತಾಗಿ ನಾಂಗೀ ಮ್ಹಳ್ಳೆಂ ನಿರ್ಣಯ್ ಕರ್ಚೊ ದೆಕುನ್ ಹೆಂ ಸಾರ್ವತ್ರೀಕ್ ರೀತಿನ್ ನಿರ್ಣಯ್ ಕರುಂಕ್ ಜಾಯ್ನಾ. ಪ್ರಥಮ್ ವರ್ದಿ ಸ್ಟೇಶನಾಕ್ ವಚುನ್ ದಿಲ್ಯಾರ್ ಚಡಿತ್ ಬರೆಂ. ಹ್ಯಾ ವೆಳಾರ್ ಮಾಹೆತ್ ದಿಲ್ಯಾಕ್ ಸಾಕ್ಷ್ ಜಾವ್ನ್ ಹಿಂಬರಹಾ ವರ್ದಿ ದಿಲ್ಯಾಕ್ ಮೆಳ್ತಾ. ಪ್ರಥಮ್ ಮಾಹೆತಿಚಿ ವರ್ದಿ ದಿತಾಸ್ತಾನಾ ದಿತೆಲ್ಯಾ ವ್ಯಕ್ತಿನ್ ಚಾರ್ ಕೋಪಿ ಕರ್ನ್, ತಾಂತುನ್ ತೀನ್ ಕೊಪಿ ಪೋಲಿಸ್ ಅಧಿಕಾರಿಂಕ್ ದೀವ್ನ್ ಎಕ್ ಕೊಪಿಯೆಚೆರ್ ತಾಂಚಿ ಮ್ಹೊರ್ ಅನಿ ದಸ್ಕತ್ ಕಾಣ್ಘೆವ್ನ್ ಅಯ್ಲ್ಯಾರ್ ದಿಲ್ಲ್ಯಾ ವರ್ದೆಚೊ ದಾಖ್ಲೊ ಮೆಳ್ತಾ ವಾ ಪೋಲಿಸ್ ಅಧಿಕಾರಿನಂಚ್ ವರ್ದಿ ಬರಯ್ಲಾ ತರ್ ತಾಚಿ ಎಕ್ ಕಾರ್ಬನ್ ಕೊಪಿ ಕಾಣ್ಘಂವ್ಚಿ.
ಪೋಲಿಸ್ ಠಾಣಾಧಿಕಾರಿಚೆ ಕಾಯ್ದೆ:
- ಮಹೆತ್‌ದಾರಾನ್ ಪೋಲಿಸ್ ಠಾಣಾಧಿಕಾರಿಕ್ ದಿಲ್ಲೆ ಮಾಹೆತಿಂತ್ ಎಕ್ ಅಪ್ರಾದ್ ಜಾಂವ್ಕ್ ಜಾಯ್ ಪಡ್ಚಿಂ ಲಕ್ಷಣಾ ಅಸ್ತಿತ್ ತರ್ ತ್ಯಾ ಪೋಲಿಸ್ ಅಧಿಕಾರಿನ್ ತಿ ಮಾಹೆತ್ ವರ್ದಿ ಜಾವ್ನ್ ಘೆನಾಸ್ತಾಂ ದುಸ್ರಿ ವಾಟ್ ನಾಂ.
- ಪೋಲಿಸ್ ಠಾಣ್ಯಾಚಾ ಅಧಿಕಾರಿನ್ ಪ್ರಥಮ್ ವರ್ದಿ ಜಾತಾ ತಿತ್ಲ್ಯಾ ವೆಗ್ಗಿಂ ದಾಖಲ್ ಕರ್ನ್ ಘೇಂವ್ಕ್ ಜಾಯ್ ಅನಿಂ ಕಾರಣ್ ನಾಸ್ತಾಂ ವೇಳಾಚೊ ದುರುಪಯೋಗ್ ಕರುಂಕ್ ನಜೊ.
- ಮಾಹೆತ್‌ದಾರಾನ್ ದಿಲ್ಲ್ಯಾ ಮಾಹೆತಿ ಪ್ರಕಾರ್ ಪ್ರಥಮ್ ವರ್ದಿ ಕಾಣ್ಗೆವ್ನ್ ದಾಖಲ್ ಕರಿಜೆ ಶಿವಾಯ್, ಅಧಿಕಾರಿಕ್ ಖುಶಿ ಅಸಲ್ಲೆ ಪ್ರಕಾರ್ ಘೇಂವ್ಚಿ ನ್ಹಯ್.
- ಪೋಲಿಸ್ ಸ್ಟೇಶನಾಂತ್ ದವರಲ್ಲ್ಯಾ ಡ್ಯೆರಿಂತ್ ಮಾಹೆತ್‌ದಾರ್ ಅಯಿಲ್ಲೊ ಅನಿ ಗೆಲ್ಲೊ ವೇಳ್ ದಾಖಲ್ ಕರಿಜಾಯ್.
- ಪ್ರಥಮ್ ವರ್ದಿ ಬರಯ್ತಾನಾ ಕಾರ್ಬನ್ ಪೇಪರ್ ದವರ್ನ್ ಚಾರ್ ಕಾಪಿ ಕರುಂಕ್ ಜಾಯ್.
- ಮಾಹೆತ್‌ದಾರಾನ್ ದಿಲ್ಲಿ ಮಾಹೆತ್ ವರ್ದಿ ಜಾವ್ನ್ ಘೆತಲ್ಲೆ ಉಪ್ರಾಂತ್ ತ್ಯಾ ಪೋಲಿಸ್ ಅಧಿಕಾರಿನ್ ಮಾಹೆತ್ ದಾರಾಕ್ ತಾಚಿ ಪ್ರತಿ ಪ್ಯೆಶಾಂ ವಿಣೆ ದೀಂವ್ಕ್ ಕಾಯ್ದೊ ಅಸಾ.
- ಮಾಹೆತ್‌ದಾರಾನ್ ದಿಲ್ಲ್ಯಾ ವರ್ದೆಚಿ ಎಕ್ ಕಾಪಿ ಜುಡಿಶಿಯಲ್ ಮ್ಯಾಜಿಸ್ಟ್ರೇಟಾಕ್ ದಾಡ್ನ್ ದೀಂವ್ಕ್ ಜಾಯ್.
- ಮಾಹೆತ್‌ದಾರಾನ್ ದಿಲ್ಲಿ ಮಾಹೆತ್ ಅಸಾ ತಶೆಂ ದಾಖಲ್ ಕರ್ಚೊ ಪೋಲಿಸಾಂಚೊ ಕಾಯ್ದೊ.
ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರಿನಾ ಜಾಲ್ಯಾರ್ ಪೋಲಿಸ್ ಅಧಿಕಾರಿ ವಿರೋದ್ ಕಿತೆಂ ಕಾನುನ್ ಕ್ರಮ್ ಘೆವ್ಯೆತ್:
ಸುಪ್ರೀಮ್ ಕೋಡ್ತ್ ಲಲಿತ್ ಕುಮಾರಿ ವಿರೋದ್ ಉತ್ತರಾ ಪ್ರದೇಶ್ ಸರ್ಕಾರ್ ಅನಿ ಹೆರ್ (2009)- ಹ್ಯಾ ದಾವ್ಯಾಂತ್ ಸರ್ಕಾರಾಂಕ್ ಉದ್ದೇಶಿಸುನ್ ಸುಪ್ರೀಮ್ ಕೋಡ್ತ್ ಮ್ಹಣ್ತಾ- ಜರ್ ಪೋಲಿಸ್ ಅಧಿಕಾರಿ ಪ್ರಥಮ್ ವರ್ದಿ ದಾಖಲ್ ಕರಿನಾಂತ್ ತರ್ ಸರ್ಕಾರಾನ್ ಹ್ಯಾ ದಿಶೆನ್ ತಾಣಿಂ ದಾಖಲ್ ಕರ್ನ್ ಮಾಹೆತ್‌ದಾರಾಕ್ ಕಾಪಿ 24 ಘಂಟ್ಯಾ ಭಿತರ್ ದೀಂವ್ಚೆ ಬರಿಂ ಪಳೆಂವ್ಚೆ ನಾಂ ತರ್ ಸಂಭಂಧ್ ಜಾಲ್ಲ್ಯಾ ಮ್ಯಾಜಿಸ್ಟ್ರೇಟಾನ್ ತ್ಯಾ ಪೋಲಿಸ್ ಅಧಿಕಾರಿ ವಿರೋದ್ ಕೇಸ್ ದಾಖಲ್ ಕರ್ನ್ ಕಾರಣ್ ನಾಸ್ತಾಂ ಮಾಹೆತ್‌ದಾರಾನ್ ದಿಲ್ಲಿ ಮಾಹೆತ್ ದಾಖಲ್ ಕರ್ನಾಸ್ತಾಂ ತಾಚ್ಯಾ ಕಾಯ್ದ್ಯಾಂತ್ ಚುಕ್ಲಾ ಮ್ಹಳ್ಳ್ಯಾ ಖಾತಿರ್ ತ್ಯಾ ಅಧಿಕಾರಿಕ್ ಶಿಕ್ಷಾ ದೀಂವ್ಕ್ ಸಂಪೂರ್ಣ್ ಅಧಿಕಾರ್ ಅಸಾ.
ಮಾಹೆತ್ ದಿತೆಲ್ಯಾಚಿಂ ಹಕ್ಕಾಂ
- ಮಾಹೆತ್ ದಿತೆಲ್ಯಾಚಿ ಅರ್ಥಿಕ್ ವಾ ಸಮಾಜಿಕ್ ಸ್ಥಿತಿ ಖಂಯ್ಚ್ಯಾಯ್ ರೀತಿಚಿ ಅಸ್ಲ್ಯಾರಿ, ಪೋಲಿಸ್ ಅಧಿಕಾರಿನ್ ತಾಕಾ ಫಾವೊ ತೊ ಮ್ಹಾನ್ ಅನಿ ಗ್‌ರವ್ ದೀಂವ್ಕ್ ಜಾಯ್.
- ಮಾಹೆತ್‌ದಾರಾನ್ ದಿಲ್ಲಿ ಮಾಹೆತ್ ವರ್ದಿ ಜಾವ್ನ್ ಘೆತಲ್ಲೆ ಉಪ್ರಾಂತ್ ತ್ಯಾ ಪೋಲಿಸ್ ಅಧಿಕಾರಿ ಥಾವ್ನ್ ಮಾಹೆತ್ ದಾರಾನ್ ತಾಚಿ ಪ್ರತಿ ಪ್ಯೆಶಾಂ ವಿಣೆ ದೀಂವ್ಕ್ ಕಾಯ್ದೊ ಅಸಾ.
- ಮಾಹೆತ್‌ದಾರಾನ್ ಘಡಿತ್ ವಿಶಿಂ ದಿಲ್ಲಿ ಮಾಹೆತ್ ಪೋಲಿಸ್ ಅಧಿಕಾರಿ ಘೆಂವ್ಕ್ ನಿರಾಕರ್ಸಿತಾ ತರ್, ತಾಚ್ಯಾ ವ್ಹಡಿಲಾಕ್ ಮ್ಹಳ್ಳ್ಯಾರ್ ಎಸ್.ಪಿ ಕ್ ದೀಂವ್ಕ್ ಜಾಯ್. ಎಸ್. ಪಿ.ನ್ ಮಾಹೆತ್ ದಾರಾ ಥಾವ್ನ್ ಮಾಹೆತ್ ಅಪ್ಣಾಯಿಲ್ಲ್ಯಾ ಉಪ್ರಾಂತ್ ತಾಣೆಂ ತಾಚ್ಯಾ ಸಕಯ್ಲ್ಯಾ ಅಧಿಕಾರಿಕ್ ತನ್ಕಿ ಕರುಂಕ್ ಹುಕುಮ್ ದಿವ್ಯೆತ್ ವ ತಾಣೆಂಚ್ ಸ್ವತಹಾ ತನ್ಕಿ ಕರ್ಯೆತ್.
- ಜರ್ ಎಸ್. ಪಿ. ಮಾಹೆತ್‌ದಾರಾ ಥಾವ್ನ್ ಮಾಹೆತ್ ಅಪ್ಣಾವ್ನ್ ಪ್ರಥಮ್ ವರ್ದಿ ದಾಖಲ್ ಕರುಂಕ್ ನೆಗಾರ್ ಕರ್ತಾ ತರ್, ಮಾಹೆತ್‌ದಾರಾನ್ ಮಾಜಿಸ್ಟ್ರೇಟ ಮುಕಾರ್ ವಕೀಲಾ ದ್ವಾರಿ ವ ಸ್ವಂತ್ ವಚುನ್ ಕಂಪ್ಲೇಟ್ ದಾಖಲ್ ಕರ್ಯೆತ್. ಮಾಜಿಸ್ಟ್ರೇಟ್ ಪೋಲಿಸ್ ಅಧಿಕಾರಿಕ್ ನಿರ್ದೇಶನ್ ದೀವ್ನ್ ಪ್ರಥಮ್ ವರ್ದಿ ದಾಖಲ್ ಕರುಂಕ್ ಅಜ್ನ್ಯಾ ದಿತಾ.
- ಜರ್ ಮ್ಯಾಜಿಸ್ಟ್ರೇಟ್ ಕಂಪ್ಲೇಟ್ ಘೆಂವ್ಕ್ ನಿರಾಕರ್ಸಿತಾ ವ ಸಾರ್ಕೊ ನ್ಯಾಯ್ ದೀಂವ್ಕ್ ಚುಕ್ತಾ ತರ್, ಮಾಹೆತ್‌ದಾರಾನ್ ಹ್ಯೆ ಕೋಡ್ತಿಕ್ ರಿಟ್ ಅರ್ಜಿ ದ್ವಾರಿ ಪೋಲಿಸಾನಿಂ ತಾಣೆ ದಿಲ್ಲಿ ಮಾಹೆತ್ ದಾಖಲ್ ಕರ್ಚೆ ಬರಿ ಅದೇಶ್ ಹಾಡ್ಯೆತ್.
ಕೊಣೆಂ ಮಾಹೆತ್ ದಿವ್ಯೆತ್:
- ಘಡಿತ್ ವ ಹಲ್ಲ್ಯಾಕ್ ಒಳಗ್ ಜಾಲ್ಲ್ಯಾ ವ್ಯಕ್ತಿನ್ ವ ತಾಚ್ಯಾ ನಾಂವಾನ್ ಹೆರ್ ಕೊಣೆಂಯ್; ವ
- ಘಡಿತ್ ಜಾಣಾ ಅಸ್ಚ್ಯಾ ಖಂಯ್ಚ್ಯಾಯ್ ವ್ಯಕ್ತಿನ್; ವ
- ಘಡಿತಾಂತ್ ಅರೋಪಿ ಜಾವ್ನಾಸ್ಚ್ಯಾ ವ್ಯಕ್ತಿನ್; ವ
- ಪೋಲಿಸ್ ಅಧಿಕಾರಿನಂಚ್, ಜರ್ ತಾಚ್ಯಾ ಗಮನಾಕ್ ತೆಂ ಘಡಿತ್ ಅಯ್ಲೆಂ ತರ್; ವ
- ಮ್ಯಾಜಿಸ್ಟ್ರೇಟಾನ್ ಅದೇಶ್ ದಿಲಾ ತರ್.
ಮಾಹೆತ್ ವೇಳ್ ಕರ್ನ್ ದಾಖಲ್ ಕೆಲ್ಯಾರ್?:
ಮಾಹೆತ್‌ದಾರಾನ್ ವೇಳ್ ಕರ್ನ್ ಮಾಹೆತ್ ದಿಲ್ಯಾರ್ ತಾಕಾ ಸೂಕ್ತ್ ಕಾರಣಾಂ ದೀಂವ್ಕ್ ಜಾಯ್ ನಾಂ ತರ್ ತ್ಯಾ ಮಾಹೆತಿಚ್ಯಾ ಸತಾಚೆರ್ ದುಬಾವ್ ಯೆತಾ.
ಹಾಂಗಾಸರ್ ತೀನ್ ರೀತಿನ್ ಪ್ರಥಮ್ ವರ್ದಿ ದಾಖಲ್ ಕರ್ಚ್ಯಾಂತ್ ವೇಳ್ ಜಾಂವ್ಚಿ ಸಾಧ್ಯತಾ ಅಸಾ-
- ಮಾಹೆತ್ ದಾರಾನ್ ಪ್ರಥಮ್ ವರ್ದಿ ದಾಖಲ್ ಕರುಂಕ್ ಮಾಹೆತ್ ದೀಂವ್ಚ್ಯಾಂತ್ ವೇಳ್ ಕೆಲೊ ವೆಳಾರ್,
- ಪೋಲಿಸ್ ಅಧಿಕಾರಿನ್ ಪ್ರಥಮ್ ವರ್ದಿ ದಾಖಲ್ ಕರುಂಕ್ ವೇಳ್ ಕೆಲ್ಲ್ಯಾ ವೇಳಾರ್,
- ಮ್ಯಾಜಿಸ್ಟ್ರೇಟಾಕ್ ವರ್ದಿ ಪಾವಿತ್ ಕರುಂಕ್ ವೇಳ್ ಕೆಲ್ಲ್ಯಾ ವೇಳಾರ್.
ಪ್ರಥಮ್ ವರ್ದಿ ಘಡಿತ್ ಜಾಲ್ಲ್ಯಾ ಇತ್ಲ್ಯಾಚ್ ವೆಳಾ ಭಿತರ್ ದಾಖಲ್ ಕರಿಜಾಯ್ ಮ್ಹಳ್ಳೆಂ ಕಾನುನ್ ನಾಂ. ವೇಳ್ ಜಾಲ್ಯಾ ವಾ ನಾಂ ಮ್ಹಳ್ಳೆಂ ಹರೇಕಾ ಕೇಸಿಚ್ಯಾ ವಸ್ತು ಸ್ಥಿತೆರ್ ಹೊಂದೊನ್ ಅಸಾ.
ಪ್ರಥಮ್ ವರ್ದಿ ಅನಿ ಅಧಿಕಾರಾಚಿ ವ್ಯಾಪ್ತಿ: (FIR & Jurisdiction)
ಅನ್ಯಾಯಾಚೆಂ ಘಡಿತ್ ದೊನ್ ರೀತಿನ್ ವಿಂಗಡಣ್ ಕರ್ಯೆತ್- ಪಯ್ಲೆಂ, (cognizable) ಜಾಲ್ಲೆಂ ಘಡಿತ್ ಗಮನಾಕ್ ಘೆವ್ನ್ ತಾಚಿ ತನ್ಕಿ ಕರುಂಕ್ ಅಧಿಕಾರ್ ಅಸ್ಚೊ. ಅನಿಂ (non- cognizable) ಜಾಲ್ಲ್ಯಾ ಘಡಿತಾಚಿ ಪ್ರಥಮ್ ಮಾಹೆತ್ ದಾಖಲ್ ಕರ್ನ್ ತಾಚಿ ತನ್ಕಿ ಕರುಂಕ್ ಮ್ಯಾಜಿಸ್ಟ್ರೇಟಾಚಿ ಪರ್ವಣ್ಗಿ ಗರ್ಜ್. ಘಡಿತ್ ಜಾಲ್ಲೆಂ ಅಪ್ಲ್ಯಾ ಅಧಿಕಾರಚ್ಯಾ ಗಡಿ ಬಿತರ್ ಯೆನಾ ಮ್ಹಳ್ಳ್ಯಾ ಕಾರಣಾನ್ ಪೋಲಿಸ್ ಅಧಿಕಾರಿನ್ ಪ್ರಥಮ್ ವರ್ದಿ ದಾಖಲ್ ನಿರಾಕರ್ಸುಂಕ್ ಜಾಯ್ನಾ. ಅಶೆಂ ನೆಗಾರ್ ಕೆಲೆಂ ತರ್ ತ್ಯಾ ಅಧಿಕಾರಿಚಿ ನಿರ್ಲಕ್ಷಾ ಜಾತಾ. ದಂಡ ಪ್ರಕ್ರೀಯ ಸಂಹಿತೆಚಿ ಕಲಂ ೧೫೪ ಅನಿಂ ೧೫೫ ವಿಶ್ಲೇಷಣ್ ಕೆಲಿಂ ತರ್, ಪ್ರಥಮ್ ವರ್ದಿ ದಾಖಲ್ ಕರುಂಕ್ ಅಧಿಕಾರಾಚ್ಯಾ ಗಡಿ ಬಿತರ್ ತೆಂ ಘಡಿತ್ ಯೆಜಾಯ್ ಮ್ಹಳ್ಳಿ ಗರ್ಜ್ ನಾಂ.
ಕಲಂ 154 oತ್ ಖಂಯ್ಸರಿಯಿ (cognizable) ಮ್ಯಾಜಿಸ್ಟ್ರೇಟಾಚಿ ಪರ್ವಣ್ಗಿ ನಾಸ್ತಾ ತನ್ಕಿ ಕರ್ಚೆಂ ತಸಲ್ಯಾ ಘಡಿತಾಚಿ ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರಿಜೆ ತರ್ ತೆಂ ಘಡಿತ್ ತ್ಯಾ ಪೋಲಿಸ್ ಠಾಣ್ಯಾಚಾ ಪ್ರಾದೇಶಿಕ್ ವ್ಯಾಪ್ತಿ ಭಿತರ್ ಯೆಜಾಯ್ ಮ್ಹಳ್ಳೊ ಉಲ್ಲೇಖ್ ನಾಂ. ಪುಣ್ ಕಲಂ ೧೫೫ ಪ್ರಕಾರ್ (non- cognizable) ತನ್ಕಿ ಕರುಂಕ್ ಮ್ಯಾಜಿಸ್ಟ್ರೇಟಾಚಿ ಪರ್ವಣ್ಗೆಚಿ ಗರ್ಜ್ ಅಸಲ್ಲ್ಯಾ ತಸಲ್ಯಾ ಘಡಿತಾಚಿ ಮಾಹೆತ್ ತ್ಯಾ ಠಾಣ್ಯಾಚಾ ಪ್ರಾದೇಶಿಕ್ ಪರಿ ವ್ಯಾಪ್ತಿ ಭಿತರ್ ಯೆಜಾಯ್ ಮ್ಹಣ್ ಸಾಂಗ್ತಾ. ಹ್ಯಾ ಮುಕಾಂತ್ರ್ ಎಕಾ ಪೋಲಿಸ್ ಅಧಿಕಾರಿನ್ ತಸಲೆಂ (non- cognizable) ಘಡಿತ್ ಅಪ್ಲ್ಯಾ ಠಾಣ್ಯಾಚಾ ಪ್ರಾದೇಶಿಕ್ ವ್ಯಾಪ್ತಿ ಭಿತರ್ ಯೆನಾ ಮ್ಹಣ್ ಸಾಂಗ್ಯೆತಾ. ದೆಕುನ್ (cognizable) ಮ್ಯಾಜಿಸ್ಟ್ರೇಟಾಚಿ ಪರ್ವಣ್ಗಿ ನಾಸ್ತಾ ತನ್ಕಿ ಕರ್ಚೆಂ ತಸಲ್ಯಾ ಅಪ್ರಾದಾ ವಿಶ್ಯಾಂತ್ ಮಾಹೆತ್‌ದಾರ್ ಮಾಹೆತ್ ದೀಂವ್ಕ್ ಗೆಲ್ಲ್ಯಾ ವೆಳಿಂ ಅಪ್ಣಾಕ್ ಅಧಿಕಾರಾಚಿ ವ್ಯಾಪ್ತಿ ನಾ ಮ್ಹಳ್ಳೆಂ ಕಾರಣ್ ದಿಂವ್ಕ್ ಜಾಯ್ನಾ, ಬದ್ಲಾಕ್ ಅಧಿಕಾರಾಚಿ ವ್ಯಾಪ್ತಿ ನಾಂ ತರೀ ತಿ ಮಾಹೆತ್ ತಾಣೆಂ ಘೆವ್ನ್ ಖಂಯ್ಚ್ಯಾ ಠಾಣ್ಯಾಚಾ ವ್ಯಾಪ್ತಿಕ್ ಯೆತಾ ತ್ಯಾ ಠಾಣ್ಯಾಕ್ ಹಸ್ತಾಂತರ್ ಕರ್ಚಿ ಜವಬ್ದಾರಿ ಅಸಾ.
ದಿಲ್ಲಿ ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರುಂಕ್ ಸಾದ್ಯ್ ಅಸಾಗೀ?
ಮಾಹೆತ್ ದಾರಾನ್ ಪೋಲಿಸ್ ಠಾಣ್ಯಾಕ್ ದಿಲ್ಲಿ ಪ್ರಥಮ್ ಮಾಹೆತ್ ವರ್ದಿ ಪೋಲಿಸ್ ಅಧಿಕಾರಿನ್ ರದ್ದ್ ಕರುಂಕ್ ಸಾದ್ಯ್ ನಾಂ ವ ಮಾಹೆತ್ ದಾರಾನ್ ಪಾಟಿಂ ಕಾಡುಂಕ್‌ಯೀ ಸಾದ್ಯ್ ನಾಂ. ದಿಲ್ಲ್ಯಾ ವರ್ದೆಚೆರ್ ಲಬ್ದೊನ್ ತನ್ಕಿ ಕೆಲ್ಯಾ ಉಪ್ರಾಂತ್ ಕಾಂಯ್ ಅಪ್ರಾದ್ ಮೆಳಾನಾ ತರೀ ತ್ಯಾ ಪೋಲಿಸ್ ಅಧಿಕಾರಿನ್ ತಿ ಪ್ರಥಮ್ ವರ್ದಿ ರದ್ದ್ ಕರುಂಕ್ ತಾಕಾ ಅಧಿಕಾರ್ ನಾಂ, ಬದ್ಲಾಕ್ ತಾಚ್ಯಾ ತನ್ಕೆಚಿ ವರ್ದಿ ತಾಣೆಂ ಕೊಡ್ತಿಕ್ ಹಾಜರ್ ಕರುಂಕ್ ಅಸಾ. ತಾಚಿ ವರ್ದಿ ತೀನ್ ರೀತಿನಿಂ ಕೋಡ್ತಿಕ್ ದಾಖಲ್ ಕರ್ಯೆತಾ-
- ಚಾರ್ಜ್ ಶೀಟ್ (ಅರೋಪ್ ಪಟ್ಟಿ)- ಜಾಲ್ಲೆಂ ಘಡಿತಾಚೊ ವಿವರ್ ದೀಂವ್ಚಿ ವರ್ದಿ. ಜಾಲ್ಲೆಂ ಘಡಿತ್ ನೀಜ್ ಅನಿ ಘಡಿತಾಕ್ ಕಾರಣ್ ಜಾಲ್ಲ್ಯಾ ಅಪ್ರಾದಿಂಚಿ ನಾಂವಾ ಅನಿಂ ವಿವರ್, ತಶೆಂಚ್ ಅಪ್ರಾದಾಕ್ ಒಳಗ್ ಜಾಲ್ಲ್ಯಾಚೊ ವಿವರ್. ಅಶೆಂ ಸಗ್ಳೆಂ ಘಡಿತ್ ಜಾಲಾ ಮ್ಹಳ್ಳ್ಯಾಚೊ ಸವಿಸ್ತಾರ್ ವಿವರ್ ಹ್ಯಾ ವರ್ದೆಂತ್ ಅಸ್ತಾ.
- ‘ಬಿ’ ರಿಪೋರ್ಟ್- ಪ್ರಥಮ್ ಮಾಹೆತಿಂತ್ ಉಲ್ಲೇಖ್ ಕೆಲ್ಲ್ಯಾ ತಸಲೊ ಅಪ್ರಾದ್ ಘಡೊಂಕ್ ನಾಂ ಮ್ಹಳ್ಳಿ ವರ್ದಿ ತನ್ಕಿ ಕೆಲ್ಲ್ಯಾ ಪೋಲಿಸ್ ಅಧಿಕಾರಿನ್ ಕೊಡ್ತಿಕ್ ದಾಖಲ್ ಕರ್ಚಿ ವರ್ದಿ.
- ‘ಸಿ’ ರಿಪೋರ್ಟ್- ಪ್ರಥಮ್ ಮಾಹೆತ್ ವರ್ದೆಂತ್ ಉಲ್ಲೇಖ್ ಕೆಲ್ಲೆಂ ಘಡಿತ್ ಘಡ್ಲಾಂ ಪುಣ್ ಅಪ್ರಾದಿ ಕೋಣ್ ಮ್ಹಳ್ಳೆಂ ಸೊದುನ್ ಕಾಡುಂಕ್ ಜಾವ್ನಾಂ/ ಅಪ್ರಾದಿ ಮೆಳೊಂಕ್ ನಾಂತ್ ಮ್ಹಣ್ ತನ್ಕಿ ಕೆಲ್ಲ್ಯಾ ಅಧಿಕಾರಿನ್ ಕೊಡ್ತಿಕ್ ದೀಂವ್ಚಿ ವರ್ದಿ. ಕೋಡ್ತಿನ್ ಉಪ್ರಾಂತ್ ಕೆದಾಳಾಯ್ ಹಿ ವರ್ದಿ ಉಗ್ತಿ ಕರ್ನ್ ಪರ್ತ್ಯಾನ್ ತನ್ಕೆಕ್ ಅವ್ಕಾಸ್ ದಿವ್ಯೆತ್.
ಕೋಡ್ತಿಕ್ ಹಾಜರ್ ಕೆಲ್ಲ್ಯಾ ವರ್ದೆಚೆರ್ ಹೊಂದೊನ್ ಕೋಡ್ತ್ ಸಾಕ್ಷಿಂಚಿ ತನ್ಕಿ ಕರ್ನ್ ನ್ಯಾಯ್ ದಿತಾ. ದಂಡ ಸಂಹಿತೆಚ್ಯಾ ಮುಳಾಂತ್ ಎಕಾ ಮ್ಯಾಜಿಸ್ಟ್ರೇಟಾನ್ ಪ್ರಥಮ್ ಮಾಹೆತ್ ವರ್ದೆ ದ್ವಾರಿ ಕಾಂಯ್ ಅಪ್ರಾದ್ ಮೆಳಾನಾಂ ಮ್ಹಳ್ಳ್ಯಾ ಕಾರಣಾಕ್ ಪ್ರಥಮ್ ಮಾಹೆತ್ ವರ್ದಿ ರದ್ದ್ ಕರುಂಕ್ ಅವ್ಕಾಸ್ ನಾಂ ಬದ್ಲಾಕ್ ತ್ಯಾ ವರ್ದೆ ಥಾವ್ನ್ ಕಾಂಯ್ ಅಪ್ರಾದ್ ಮೆಳಾನಾ ಮ್ಹಣ್ ತಿ ಕೇಸ್ ಅಂತ್ಯ್ ಕರ್ಯೆತಾ ಅನಿ ಹ್ಯಾ ದ್ವಾರಿ ತಿ ಪ್ರಥಮ್ ಮಾಹೆತ್ ವರ್ದಿ ತಾಚೆಸ್ತಕೀ ರದ್ದ್ ಜಾತಾ.
ಸಿವಿಲ್ ದಾವ್ಯಾಂತ್ ಪೋಲಿಸ್ ಅಧಿಕಾರಿನ್ ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರ್ನ್ ತನ್ಕಿ ಕರ್ಯೆತ್‌ಗೀ?
ಪೋಲಿಸ್ ಅಧಿಕಾರಿಂಕ್ ಸಿವಿಲ್, ಕಾಜಾರಾಚ್ಯಾ ಅನಿ ಪಯ್ಶ್ಯಾಂಚಾ ದಾವ್ಯಾನಿಂ ಪ್ರಥಮ್ ಮಾಹೆತ್ ವರ್ದಿ ದಾಖಲ್ ಕರ್ನ್ ಕ್ರಿಮಿನಲ್ ದಾವ್ಯಾ ಪರಿ ತನ್ಕಿ ಕರುಂಕ್ ಅಡ್ವಾರ್ಲಾ. ಕೊಣಿಯೀ ಜರ್ ಸಿವಿಲ್ ಸಂಗ್ತಿಂಚೆರ್ ಪೋಲಿಸಾಂಕ್ ದೂರ್ ದಿತಾ ತರ್ ಪೋಲಿಸಾನಿಂ ತೆಂ ದೂರ್ ಎಕ್ ಅರ್ಜಿ ಮ್ಹಣ್ ದಾಖಲ್ ಕರ್ಯೆತಾ. ಹ್ಯಾ ದೂರಾಖಾಲ್ ಪೋಲಿಸ್ ಅಧಿಕಾರಿಕ್ ಕ್ರಿಮಿನಲ್ ದೂರಾ ಪರಿ ತನ್ಕಿ ಕರುಂಕ್ ಸಾದ್ಯ್ ನಾಂ ತರೀ, ಮುಕಾರ್ ಜಾಂವ್ಕ್ ಅಸ್ಚೊ ಅಪ್ರಾದ್ ಅಡಂವ್ಚ್ಯಾ ಖಾತಿರ್ ದಂಡ ಸಂಹಿತೆಚ್ಯಾ ಕಲಂ ೧೪೯ ಚ್ಯಾ ಪ್ರಕಾರ್ ತಾಚೊ ಅಧಿಕಾರ್ ಉಪಯೋಗ್ ಕರ್ಯೆತಾ.
