ಲೋಕ್ ಪ್ರತಿನಿಧಿತ್ವ್ ಕಾನುನ್, 1951 ಚಾ ಕಲಂ 8 (4) ವಿರೋಧ್ ಲಿಲ್ಲಿ ತೋಮಾಸ್ ಅನಿ ಲೋಕ್ ಪ್ರಹಾರಿ ಮ್ಹಳ್ಳ್ಯಾ ಎನ್.ಜಿ.ಒ ನ್ ಘಾಲ್ಲ್ಯಾ ಹಿತಾಸಕ್ತೆ ಅರ್ಜೆಚೆಂ ವಿಷ್ಲೇಶಣ್ ಕರ್ನ್ ಸುಪ್ರೀಮ್ ಕೊಡ್ತಿಚೆ ನೀತಿಕರ್ತ್ ಎ. ಜೆ. ಪಾಟ್ನಾಯಿಕ್ ಅನಿ ಎಸ್. ಜೆ. ಮುಕೋಪಾದ್ಯಾಯಾ ಪಿಠಾನ್ ಕ್ರೀಮಿನಲ್ ಕೇಸಿಂತ್ ಮೆಳಲ್ಲ್ಯಾ ವೈಕ್ತಿನಿ ಶಾಸಕ್ ಅನಿ ಸಂಸದ್ ಜಾಂವ್ಕ್ ಅಸಾದ್ಯ್ ಮ್ಹಣ್ ಜುಲೈಚಾ 10 ತಾರೀಕೆರ್ ಐತಿಹಾಸಿಕ್ ತೀರ್ಪ್ ದಿಲಾಂ.
ಲೋಕ್ ಪ್ರತಿನಿಧಿತ್ವ್ ಕಾಯ್ದ್ಯಾಚೆ ಕಲಂ 8 (4) ಪ್ರಕಾರ್ ಜರ್ ಶಾಸಕ್ ಅನಿ ಸಂಸದಾಂಚ್ಯೊ ಕ್ರಿಮಿನಲ್ ಕೇಸಿ ಕೋಡ್ತಿ ಸಮೊರ್ ಚಾಲು ಅಸಾತ್ ತರ್ ತಾಣಿಂ ತಾಂಚೆ ಪ್ರತಿನಿಧಿತ್ವ್ ಶಾಸಕ್ ಅನಿ ಸಂಸದ್ ಜಾವ್ನ್ ಮುಂದರುನ್ ವರುಯೆತ್ ಮ್ಹಣ್ತಾ. ಪುಣ್ ಹ್ಯಾ ಪ್ರಸ್ತುತ್ ದಾವ್ಯಾಂತ್ ಅರ್ಜಿದಾರಾಂ ಹ್ಯಾ ಕಾನುನಾಚೆಂ ಕಲಂ ಸಾರ್ಕೆ ನಾ ಮ್ಹಳ್ಳೊ ವಾದ್ ಮಾಂಡುನ್ ಹ್ಯಾ ಕಾನುನಾಚೆ ಕಲಂ ರದ್ದ್ ಕರಿಜಾಯ್ ಮ್ಹಣ್ ವಿನಂತಿ ಕೆಲ್ಲ್ಯಾಕ್ ಸುಪ್ರೀಮ್ ಕೋಡ್ತ್ ‘ಶಾಸಕ್ ಅನಿ ಸಂಸದ್ ಕ್ರಿಮಿನಲ್ ಕೇಸಿಚಾ ಕಾತ್ರಿಂತ್ ಶಿರ್ಕೊನ್ ಕೊಡ್ತಿಚಾ ಶಿಕ್ಷೇಕ್ ಒಳಗ್ ಜಾಲ್ಲ್ಯಾ ದೀಸಾ ಥಾವ್ನ್ ತಾಂಚೆ ಸಾಂದೆಪಣ್ ರದ್ದ್ ಜಾತಾ ಅನಿ ಉಂಚ್ಲ್ಯಾ ಕೋಡ್ತಿಂತ್ ಅಪೀಲ್ ಚಾಲು ಅಸಾ ತರೀ ತಾಂಚೆ ಸಾಂದ್ಯಾಪಣಾಂತ್ ಮುಂದರುನ್ ವಚುಂಕ್ ತಾಂಕಾ ಸಾಧ್ಯ್ ನಾಂ’ ಮ್ಹಣ್ತಾಂ.
ಸಾಂಗಾತಾಚ್ಚ್ ಜೈಲಾಂತ್ ಅಸ್ಚ್ಯಾ ವೈಕ್ತಿನ್ ತಾತ್ಕಾಲಿಕ್ ರೀತಿನ್ ಖಂಯ್ಚ್ಯಾಯ್ ಎಲೆಕ್ಷನಾಂತ್ ಪಾತ್ರ್ ಘಂವ್ಕ್ ಅಡ್ವಾರ್ಲಾ. ಜಾಂವ್ ತೊ ವೈಕ್ತಿ ಪೋಲಿಸಾಂಚಾ ಕಸ್ಟಡಿಂತ್ ವಾ ನ್ಯಾಯಾಲಯಾಚಾ ಕಸ್ಟಡಿಂತ್ ಅಸೊ ತಾಣೆಂ ಎಲೆಕ್ಷನಾಂತ್ ಪಾತ್ರ್ ಘೆಂವ್ಕ್ ಜಾಯ್ನಾ ಅನಿ ಹಿ ಅಡ್ಕಳ್ ತೊ ಜೈಲಾಂತ್ ಅಸ್ತಾಂ ವರೇಗ್ ಮಾತ್ರ್. ಲೋಕ ಪ್ರತಿನಿಧಿತ್ವ್ ಕಾಯ್ದ್ಯಾಚಾ ಕಲಂ 62 ಪ್ರಕಾರ್ ಎಕ್ ವೈಕ್ತಿ ಜೈಲಾಂತ್ ಅಸಾ ತರ್ ತಾಕಾ ವೋಟ್ ಘಾಲುಂಕ್ ಹಕ್ಕ್ ನಾಂ ತರ್ ತಸಲ್ಯಾಚ್ ವೈಕ್ತಿನ್ ಎಲೆಕ್ಷನಾಕ್ ರಾಂವ್ಚೆ ತರೀ ಕಶೆಂ ಮ್ಹಳ್ಳಿ ಅಭಿಪ್ರಾಯ್ ಉಚಾರ್ಲಾ.
