ಸುಪ್ರೀಮ್ ಕೋಡ್ತಿಚೆ ನೀತಿಕರ್ತ್, ಅಪ್ತಾಬ್ ಅಲಂ ಅನಿ ರಂಜನ್ ಪಿ. ದೇಸಾಯಿ ಅಲಹಾಬಾದ್ ಹೈ ಕೋಡ್ತಿನ್ ಕೆಲ್ಲ್ಯಾ ಅದೇಶಾಚೆರ್ ಹೊಂದೊನ್ ಅಪ್ಲಿ ಅಭಿಪ್ರಾಯ್ ಉಚಾರ್ತಾತ್ ಅನಿ ಮ್ಹಣ್ತಾತ್ “ಉಗ್ತ್ಯಾ ಕೋಡ್ತಿಂತ್ ಅದೇಶ್ ಉಚಾರಲ್ಲ್ಯಾ ಉಪ್ರಾಂತ್ ತೊಚ್ಚ್ ಅದೇಶ್ ನೀತಿಕರ್ತಾಚಾ ದಪ್ತರಾಂತ್ ಬದ್ಲಿಲ್ಲ್ಯಾ ವೇಳಾ ಅಧೇಶಾಚೊ ಪ್ರಭಾವ್ ಪಡ್ಚ್ಯಾ ವಿರೋಧ್ ಪಾಡ್ತಿಂಚಾ ಮತೀಂತ್ ಪಾಡ್ ಅಭಿಪ್ರಾಯ್ ಯೇಂವ್ಚಿ ಸಂಪೂರ್ಣ್ ಸಾಧ್ಯತಾ ಅಸಾ. ಅಸಲಿ ರೀತಿ ಕೆದಿಂಕಚ್ಚ್ ಯೆಂವ್ಕ್ ನಜೊ”
ಅಲಹಬಾದ್ ಹೈ ಕೊಡ್ತಿನ್ ಉತ್ತರ್ ಪ್ರದೇಶ್ ಹೌಸಿಂಗ್ ಅನಿ ಡೆವಲಪ್‌ಮೆಂಟ್ ಬೊರ್ಡ್ ವಿರೋದ್ ಫಾಸ್ಟ್ ಬಿಲ್ಡರ್ಸ್ ದಾವ್ಯಾಂತ್ (ಕಮರ್ಶಿಯಲ್ ಜಾಗೆ ವಿಲೆವಾರಿ ಕರ್ಚ್ಯಾ ವಿಶ್ಯಾಂತ್ ಉಟಲ್ಲೊ ವಾದ್) ಇತ್ಯರ್ಥ್ ಕೆಲ್ಲೊ ವಿಷಯ್ ಸುಪ್ರಿಂ ಕೊಡ್ತಿ ಮುಕಾರ್ ಅಪೀಲಾ ದ್ವಾರಿ ಅಯಿಲ್ಲ್ಯಾ ಸಂದರ್ಭಾರ್ ಎಕಾ ಪಾಡ್ತಿನ್ ಕೊಡ್ತಿ ಮುಕಾರ್ ಅಲಹಾಬಾದ್ ಹೈ ಕೊಡ್ತಿಚಾ ವೆಬ್ ಸಾಯ್ಟಾ ದ್ವಾರಿಂ ಕಾಡಲ್ಲ್ಯಾ ಅದೇಶಾಚಿ ಪ್ರತಿ ಹಾಜಾರ್ ಕೆಲ್ಲ್ಯಾ ವೇಳಿಂ ತಿ ಪ್ರತಿ ಕೊಡ್ತಿ ಥಾವ್ನ್ ಅಪ್ಣಾಯಿಲ್ಲ್ಯಾ ಅದೇಶಾಚಾ ಪ್ರತಿಯೆಕ್ (ಸರ್ಟಿಫೈಡ್ ಪ್ರತಿ) ತಾಳ್ ಪಡನಾತಲ್ಲಿ. ಖಂಯ್ಚಿ ಪ್ರತಿ ಮೌಲ್ಯಾಧರಿತ್ ಮ್ಹಳ್ಳ್ಯಾ ವಿಶಿಂ ದುಬಾವ್ ಸುಪ್ರಿಂ ಕೊಡ್ತಿಕ್ ಅಯಿಲ್ಲ್ಯಾ ವರ್ವಿ ಹೈ ಕೊಡ್ತಿಚಾ ರಿಜಿಸ್ಟ್ರಾರಾ ಮುಕಾಂತ್ರ್ ಹ್ಯಾ ದೋನಿ ಪ್ರತಿಯೆ ವಿಶ್ಯಾಂತ್ ವಿವರ್ ವಿಚಾರ್ನ್, ರಿಪೊರ್ಟ್ ದಾಕಲ್ ಕರುಂಕ್ ಸಾಂಗಲ್ಲ್ಯಾ ವೇಳಿಂ ದೋನ್ ಅದೇಶ್ ವೆವೆಗ್ಳೆ ಅಸ್ಚೆ ದಿಸೊನ್ ಯೆತಾತ್. ಹಾಚಿ ತನ್ಕಿ ಕರ್ನ್ ಪಳೆತಾನಾ ಉಗ್ತ್ಯಾ ಕೊಡ್ತಿಂತ್ ದಿಲ್ಲ್ಯಾ ಅದೇಶಾಚೆರ್ ನಿತಿಕರ್ತಾನ್ ಉಪ್ರಾಂತ್ ತಾಚಾ ದಫ್ತರಾಂತ್ ಅದೇಶಾಚೆ ಬದ್ಲಾವಣ್ ಕೆಲ್ಲೆ ಉಜ್ವಾಡಾಕ್ ಅಯ್ಲೆಂ. ಸುಪ್ರಿಂ ಕೊಡ್ತಿನ್ ಹೆ ದೋನಿ ಅದೇಶ್ ರದ್ದ್ ಕರ್ನ್ ನವ್ಯಾನ್ ತನ್ಕಿ ಕರುಂಕ್ ಅಲಹಬಾದ ಹೈ ಕೊಡ್ತಿಚಾ ಮುಕೆಲ್ ನಿತಿಕರ್ತಾಕ್ ಸಲಹಾ ದಿಲಿ. ಮುಂದರುನ್ ಸುಪ್ರಿಂ ಕೊಡ್ತ್ ಮ್ಹಣ್ತಾ “ಅತೀ ವೀರಳಾಂತ್ಲ್ಯಾ ವಿರಳ್ ಸಂಧರ್ಭಾರ್ ಮಾತ್ರ್ ಎಕಾ ನಿತಿಕರ್ತಾನ್ ದಿಲ್ಲ್ಯಾ ಅದೇಶಾಕ್ ಬದ್ಲಾವಣ್ ಹಾಡಿಜಾಯ್ ಮ್ಹಳ್ಳೊ ಹುಸ್ಕೊ ಉಚಾರ್ಲೊ”
