ಸಮನ್ಸ್ ಅನಿ ತೆಂ ಕಶೆಂ ಜ್ಯಾರಿ ಕರ್ಚೆಂ (ಕ್ರಿಮಿನಲ್ ಕೇಜ್)
(ದಂಡ ಪ್ರಕ್ರೀಯ ಕಾಯ್ದೊ,1973, ಕಲಂ 61-67)
ಮಾ. ಬಾಪ್. ಫ್ರಾನ್ಸಿಸ್ ಅಸ್ಸಿಸಿ ಅಲ್ಮೇಡಾ,
ಯಾಜಕ್ ಅನಿ ವಕೀಲ್ (ಮಂಗ್ಳುರ್ ದಿಯೆಸೆಜ್)
ಎಕಾ ಅರೋಪಿಕ್ ಕೊಡ್ತಿ ಸಮೊರ್ ಹಾಡುಂಕ್ ದಂಡ ಪ್ರಕ್ರೀಯ ಕಾಯ್ದೊ 1973 ದೋನ್ ರೀತಿಚಿಂ ವಿಧಾನಾ ದಿತಾ. ಪಯ್ಲೆಂ, ಸಮನ್ಸ್ ಜ್ಯಾರಿ ಕರ್ಚೆ ಅನಿಂ ದುಸ್ರ್ಯಾನ್, ತ್ಯಾ ವ್ಯಕ್ತಿಕ್/ಅರೋಪಿಕ್ ಕ್ಯೆದ್ ಕರ್ನ್ ಕೊಡ್ತಿ ಸಮೊರ್ ಹಾಜರ್ ಕರ್ಚೆಂ. ಸಕ್ಕಡ್ ಕ್ರಿಮಿನಲ್ ಕೇಜಿ ಸಮನ್ಸ್ ಕೇಜಿ ಅನಿ ವಾರಂಟ್ ಕೇಜಿ ಮ್ಹಣ್ ದೋನ್ ರೀತಿನ್ ವಿಂಗಡಣ್ ಕರ್ಯೆತಾ.
ವಾರಂಟ್ ಕೇಜಿ ಮ್ಹಳ್ಯಾರ್ ಜ್ಯಾ ಅಪ್ರಾದಾಕ್ ಮರ್ಣಾಚಿ ಶಿಕ್ಷಾ ವ ಜೀವಾವಧಿ ಜ್ಯೇಲ್ ಶಿಕ್ಷಾ ವ ದೋನ್ ವರ್ಸಾಂಚಾಕೀ ಚಡ್ ಜ್ಯೇಲಾ ಶಿಕ್ಷಾ ಫಾವೊ ಜಾಂವ್ಚೆ ಸರ್ವ್ ಅಪ್ರಾದ್. ಉರಲ್ಲ್ಯೊ ಸರ್ವ್ ಸಮನ್ಸ್ ಕೇಜಿ ಜಾವ್ನಾಸಾತ್. ಹೆಂ ವಿಂಗಡಣ್ ಕೇಜಿಂಚಾ ಗಂಭಿರಾಯೆಚೆರ್ ಹೊಂದೊನ್ ಕೆಲಾಂ. ಹ್ಯಾ ಪ್ರಕಾರ್ ಎಕಾ ಅಪ್ರಾದಿಕ್ ಸಮನ್ಸ್ ಧಾಡ್ನ್ ಕೊಡ್ತಿಕ್ ಹಾಜರ್ ಕರಿಜಾಯ್‌ಗೀ ವಾ ಕ್ಯೇದ್ ಕರ್ನ್ ಹಾಡಿಜಾಯ್‌ಗೀ ಮ್ಹಳ್ಳ್ಯಾ ನಿರ್ಧಾರಾಕ್ ಯೆಂವ್ಚೆಂ. ದಾಖ್ಲೊ- ಮರ್ಡರ್ ಕೆಲ್ಯಾಕ್ ಕ್ಯೆದ್ ಕರ್ನ್ ಹಾಜರ್ ಕರ್ತಾತ್ ಅನಿಂ ಲ್ಯೆಸನ್ಸ್‌ನಾಸ್ತಾಂ ವಾಹನ್ ಚಲಯಿಲ್ಲ್ಯಾಕ್ ಸಮನ್ಸ್ ಧಾಡ್ನ್ ಕೋಡ್ತಿಕ್ ಹಾಜರ್ ಜಾಂವ್ಕ್ ಅಪವ್ಣೆಂ ಮೆಳ್ತಾ.
ಸಮನ್ಸ್ ಜುಡಿಶಿಯಲ್ ಮ್ಯಾಜಿಸ್ಟ್ರೇಟಾನ್ ಅಪ್ಲ್ಯಾ ಅಧಿಕಾರಾನ್ ಎಕಾ ಅರೋಪಿಕ್ ಕೊಡ್ತಿಕ್ ಹಾಜರ್ ಜಾಂವ್ಕ್ ದೀಂವ್ಚಿ ಅಜ್ನ್ಯಾ. ಸಮನ್ಸ್ ಬರ್ಪಿನಿಶಿಂ ಅಸೊನ್, ನಕಲ್ ಪ್ರತಿ ಕರ್ನ್, ಜ್ಯಾರಿ ಕೆಲ್ಲ್ಯಾ ಜುಡಿಶಿಯಲ್ ಮ್ಯಾಜಿಸ್ಟ್ರೇಟಾಚಿ ವಾ ಅಧಿಕಾರ್ ಅಸ್ಚ್ಯಾ ಖಂಯ್ಚಾಯ್ ತಸಲ್ಯಾ ಹೆರ್ ಅಧಿಕಾರಿಚಿ (ಹ್ಯೇ ಕೊಡ್ತಿಂತ್) ರುಜು ಅಸೊನ್, ಕೊಡ್ತಿಚಿ ಮ್ಹೊರ್ ಅಸ್ತೆಲಿ. ತ್ಯಾ ಸಮನ್ಸಾಂತ್ ತ್ಯಾ ವ್ಯಕ್ತಿಚೊ ಅಪ್ರಾದಾಚೊ ವಿವರ್ ಬರಂವ್ಕ್‌ಜಾಯ್ ಮ್ಹಳ್ಳ್ಯಾರ್ ಅಪ್ರಾದ್ ಜಾಲ್ಲೊ ದೀಸ್, ತಾರೀಕ್, ವೇಳ್, ಜಾಗೊ, ಇತ್ಯಾದಿ.
ಸಮನ್ಸ್ ಜ್ಯಾರಿ ಕರ್ಚಿ ರೀತ್:
1. ಸಮನ್ಸ್ ಕಶೆಂ ಜ್ಯಾರಿ ಕರ್ಚೆ (ದ. ಪ್ರ. ಕಾಯ್ದೊ 1973, ಕಲಂ 62):
ಹರೇಕ್ ಸಮನ್ಸ್ ಪೋಲಿಸ್ ಅಧಿಕಾರಿ ದ್ವಾರಿಂ ವಾ ತ್ಯಾ ರಾಜ್ಯ್ ಸರ್ಕಾರಾನ್ ದಿಲ್ಲ್ಯಾ ನಿಯಮಾವಳಿ ಪ್ರಕಾರ್ ಹೆರ್ ಕೊಣಿ ಕೊಡ್ತಿಚೊ ಅಧಿಕಾರಿ ವಾ ಹೆರ್ ಕೊಣಿ ಸಾರ್ವಜನಿಕ್ ಅಧಿಕಾರಿ. ಸಮನ್ಸ್ ಜಾಲ್ಲ್ಯಾತಿತ್ಲ್ಯಾ ಮಾಪಾನ್ ವ್ಯಕ್ತಿಗತ್ ರೀತಿನ್ ಮೇಳೊನ್ ನಕಲ್ ಪ್ರತಿ ತ್ಯಾ ವ್ಯಕ್ತಿಕ್ ದೀವ್ನ್ ಜ್ಯಾರಿ ಕರುಂಕ್ ನಿರ್ದೇಶನ್ ಅಸಾ. ಸಮನ್ಸ್ ಜ್ಯಾರಿ ಕೆಲ್ಯಾ ಅಧಿಕಾರಿನ್/ಪೋಲಿಸ್ ಅಧಿಕಾರಿನ್ ಅನ್ಯೇಕಾ ನಕಲ್ ಪ್ರತಿಯೆಚೆರ್ ಖಂಯ್ಚಾ ವ್ಯಕ್ತಿಕ್/ಅರೋಪಿಕ್ ಜ್ಯಾರಿ ಕರ್ತಾಗೀ ತ್ಯಾ ವ್ಯಕ್ತಿಚಿ/ಅರೋಪಿಚಿ ರುಜು ಕಾಣ್ಘೆಂವ್ಕ್ ಅಸಾ.
2. ಸಂಘ್ ಸಂಸ್ಥ್ಯಾಂಕ್ ಸಮನ್ಸ್ ಜ್ಯಾರಿ ಕರ್ಚೆ ವಿಧಾನ್ (ಕಲಂ 63):
ಎಕಾ ಸಂಸ್ಥ್ಯಾಕ್ ವ ಸಹಕಾರಿ ಸಂಘಾಕ್ ಸಮನ್ಸ್ ತ್ಯಾ ಸಂಸ್ಥ್ಯಾಚಾ/ಸಂಘಚ್ಯಾ ಸೆಕ್ರೇಟರಿಕ್, ಸ್ಥಳಿಯ ಮ್ಯಾನೆಜರಾಕ್ ವಾ ಹೆರ್ ಪ್ರಮುಖ್ ಅಧಿಕಾರಿಕ್ ಪಾವಿತ್ ಕೆಲ್ಯಾ ದ್ವಾರಿ ಜ್ಯಾರಿ ಜಾತಾ. ಹೆಂ ಸಮನ್ಸ್ ಸಂಸ್ಥ್ಯಾಚಾ ಮುಖ್ಯ ಅಧಿಕಾರಿಕ್ ರಿಜಿಸ್ಟರ‍್ಡ್ ಪೋಸ್ಟಾ ದ್ವಾರಿಂ ಪಾವಿತ್ ಕರ್ಚೆ ಮುಕಾಂತ್ರ್ ಜ್ಯಾರಿ ಕರ್ಯೆತ್.
3. ಸಮನ್ಸ್ ಸ್ವೀಕಾರ್ ಕರಿಜೆ ಜಾಲ್ಲೊ ವ್ಯಕ್ತಿ ಸಮನ್ಸ್ ಜ್ಯಾರಿ ಕರ್ಚ್ಯಾ ಅಧಿಕಾರಿಕ್ ಮೆಳನಾ ತರ್ (ಕಲಂ 64):
ಹ್ಯಾ ಸಂಧರ್ಬಾರ್ ಸಮನ್ಸ್ ಜ್ಯಾರಿ ಕರ್ಚೊ ವ್ಯಕ್ತಿ ತೊ ಹಾಡ್ನ್ ಅಯಿಲ್ಲ್ಯಾ ಸಮನ್ಸಾಚಿ ಎಕ್ ನಕಲ್ ಪ್ರತಿ ತಾಚಾ ಘರಾಂತ್ ಜಿಯೆಂವ್ಚಾ ಪ್ರಾಯೆಕ್ ಪಾವಲ್ಲ್ಯಾ ವ್ಯಕ್ತಿಕ್ ಪಾವಿತ್ ಕರ್ನ್ ಅನ್ಯೇಕಾ ಸಮನ್ಸಾಚ್ಯಾ ನಕಲ್ ಪ್ರತಿಯೆಚೆರ್ ತ್ಯಾ ವ್ಯಕ್ತಿಚಿ ರುಜು ಘೆತಾ.
4. ವಯ್ರ್ ದಿಲ್ಲ್ಯಾ ಪ್ರಕಾರ್ ಸಮನ್ಸ್ ಜ್ಯಾರಿ ಜಾಯ್ನಾತಲ್ಲ್ಯಾ ವೆಳಿಂ ಹೆರ್ ವಿಧಾನ್ (ಕಲಂ 65)
ಸಮನ್ಸ್ ಜ್ಯಾರಿ ಕರ್ಚೊ ಅಧಿಕಾರಿ ವಯ್ರ್ ಕಾಣ್ಸಿಲ್ಯಾ ಪ್ರಕಾರ್ ಜ್ಯಾರಿ ಕರುಂಕ್ ಜಾಯ್ನಾತಲ್ಲ್ಯಾ ವೆಳಿಂ ತೆಂ ಪಾವಿತ್ ಕರುಂಕ್ ಅಸ್ಚ್ಯಾ ವ್ಯಕ್ತಿಚಾ/ಅರೋಪಿಚ್ಯಾ ಘರ್ಚ್ಯಾ ವೊಣೊದಿಚ್ಯಾ ಪ್ರಮುಖ್ ಜಾಗ್ಯಾರ್ ತಾಕಾ ದಿಸ್ಚೆ ಬರಿ ಸಮನ್ಸಾಚಿ ಎಕ್ ನಕಲ್ ಪ್ರತಿ ಲಾಗಂವ್ಚಿ. ಅಶೆಂ ಕೆಲ್ಯಾ ಉಪ್ರಾಂತ್ ಜ್ಯಾರಿ ಕೆಲ್ಲ್ಯಾ ಅಧಿಕಾರಿಚಿ ತನ್ಕಿ ಕರ್ನ್, ಸಮನ್ಸ್ ಮೆಳಾಜೆಜಾಲ್ಲ್ಯಾ ವ್ಯಕ್ತಿಕ್ ಸಾಮಾನ್ಯ್ ಜಾವ್ನ್ ಪಾವಿತ್ ಜಾಲಾ ಮ್ಹಳ್ಳ್ಯಾ ನಿರ್ಧಾರಾಕ್ ಯೆವ್ಯೆತ್ ವಾ ನವ್ಯಾನ್ ಪರ್ತ್ಯಾನ್ ಖಂಯ್ಚಾ ರೀತಿನ್ ತ್ಯಾ ವ್ಯಕ್ತಿಕ್ ಸಮನ್ಸ್ ಜ್ಯಾರಿ ಕರುಂಕ್ ಸಾಧ್ಯ್ ಅಸಾಗೀ ಮ್ಹಳ್ಳೆ ಜಾಣಾ ಜಾವ್ನ್ ತ್ಯಾ ಪ್ರಕಾರ್ ಅದೇಶ್ ದಿವ್ಯೆತ್.
5. ಸರ್ಕಾರಿ ಅಧಿಕಾರಿಕ್ ಸಮನ್ಸ್ ಜ್ಯಾರಿ ಕರ್ಚೆ ವಿಧಾನ್ (ಕಲಂ 66):
ಸಮನ್ಸ್ ಅಪ್ಣಾಂವ್ಚೊ/ಸ್ವೀಕಾರ್ ಕರುಂಕ್ ಅಸ್ಚೊ ವ್ಯಕ್ತಿ ಪ್ರಸ್ತುತ್ ಸರ್ಕಾರಿ ಹುದ್ದ್ಯಾರ್ ಅಸಾ ತರ್ ಕೋಡ್ತ್ ತೊ ವಾವ್ರ್ ಕರ್ಚ್ಯಾ ದಪ್ತಾರಾಚಾ ಮುಖೆಲ್ ಅಧಿಕಾರಿಕ್ ಪಾವಿತ್ ಕರ್ತಾ. ತ್ಯಾ ದಪ್ತಾರಾಚೊ ಮುಖೆಲ್ ಅಧಿಕಾರಿ ವಯ್ರ್ ಕಲಂ 62 ಂತ್ ದಿಲ್ಲ್ಯಾ ಪ್ರಕಾರ್ ಜ್ಯಾರಿ ಕರ್ತಾ/ಪಾವಿತ್ ಕರ್ತಾ.
6. ಕೊಡ್ತಿಚ್ಯಾ ಅಧಿಕಾರಾಚ್ಯಾ ವ್ಯಾಪ್ತಿ ಭಾಯ್ರ್ ಅಸಲ್ಲ್ಯಾ ವ್ಯಕ್ತಿಕ್ ಸಮನ್ಸ್ ಜ್ಯಾರಿ ಜಾಂವ್ಚಿ ರೀತ್ (ಕಲಂ 67):
ಜರ್ ಸಮನ್ಸ್ ಅಪ್ಣಾಂವ್ಚೊ ವ್ಯಕ್ತಿ ಸಮನ್ಸ್ ಜ್ಯಾರಿ ಕರ್ಚ್ಯಾ ಕೊಡ್ತಿಚಾ ಅಧಿಕಾರಚ್ಯಾ ವ್ಯಾಪ್ತಿ ಭಾಯ್ರ್ ಯೆತಾ ತರ್, ತಿ ಕೊಡ್ತ್ ಸಾದಾರಣ್ ಜಾವ್ನ್ ತೆಂ ಸಮನ್ಸಾಚಿ ನಕಲ್ ಪ್ರತಿ ತಿ ವ್ಯಕ್ತಿ ಅಸ್ಚ್ಯಾ ಪ್ರದೇಶಾಚಾರ್ ಅಧಿಕಾರ್ ಅಸ್ಚ್ಯಾ ಜುಡಿಶಿಯಲ್ ಮ್ಯಾಜಿಸ್ಟ್ರೇಟಾಕ್ ಪಾವಿತ್ ಕರ್ನ್ ತಾಚಾ ಮುಖಾಂತ್ರ್ ತೆಂ ಸಮನ್ಸ್ ಜ್ಯಾರಿ ಕರಯ್ತಾ.
ಸಾಂಗಾತಾಚ್ ತೆಂ ಸಮನ್ಸ್ ರಿಜಿಸ್ಟರ್ ಪೋಸ್ಟ್ ಕರ್ನ್ ಜರ್ ತೊ/ತಿ ವ್ಯಕ್ತಿ ತೆಂ ಸ್ವೀಕಾರ್ ಕರಿನಾಸ್ತಾ ನೆಗಾರ್ ಕರ್ತಾ ತರ್ ತಾಚೆಂ ಪೋಸ್ಟಲ್ ಹಿಂಬರಹ ಕಾಣ್ಘೆವ್ನ್ ತಾಕಾ ಯುಕ್ತ್ ರೀತಿನ್ ಜ್ಯಾರಿ ಜಾಲಾಂ ಮ್ಹಣ್ ನಿರ್ಧಾರ್ ಕರ್ಯೆತಾ.
